«Nurly jer» aıasynda jeńildetilgen ıpotekany qalaı alýǵa bolady
Qazaqstannyń ıpotekalyq kompanııasy jeńildetilgen ıpotekany alý boıynsha arnaıy jadynamany shyǵardy. Oǵan sáıkes, aldymen bankke ıpotekalyq zaımdy alýǵa qajetti qujattardy, sondaı-aq memleket sýbsıdııasyn alý týraly ótinish tapsyrý qajet. Osydan keıin páter alatyn adamnyń tólem qabilettiligi men kepilzattyń bar-joǵy tekseriledi. Bank oń sheshim shyǵarsa, úsh kúnniń ishinde Qazaqstannyń ıpotekalyq kompanııasyna sýbsıdııany berý týraly qoldaýhatty jiberedi. Kompanııa óz kezeginde taǵy bes kún tıisti qujattardy tekseredi. Ol da oń sheshim shyǵarsa, úsh kúnniń ishinde bankke habar beredi. Bank osy sheshimniń negizinde nesıe alatyn adammen kelisimsharttardy rásimdeıdi. Osylaısha, adamnyń qolynda eki kelisimshart bolady. Bireýi zaım alǵany týraly bolsa, ekinshisi sýbsıdııany alýdy kózdeıdi.
Al kelisimshartty rásimdeýge qajetti qujattarǵa keler bolsaq, aldymen úıdiń qujattary bolýy shart. Sosyn múliktiń bar-joǵyn dáleldeıtin anyqtamany berý kerek. Budan bólek, kepilger, qosalqy qaryz alýshy jáne qaryz alýshynyń jeke qujattary, zeınetaqy qorynyń anyqtamasy (alty aılyq esep), mekenjaı anyqtamasy, jalaqy týraly anyqtama, satyp alynatyn baspanany baǵalaý esebi jáne alǵashqy jarna boıynsha banktiń túbirtegi bolýy qajet.
Aıta keteıik, Úkimettiń keshegi otyrysynda QR Investıtsııalar jáne damý mınıstri Jeńis Qasymbek jeńildetilgen ıpotekanyń berile bastaǵanyn málimdegen edi. Qazirgi kezde ıpotekalyq nesıelerdi sýbsıdııalaý baǵdarlamasyna «Bank TsentrKredıt» AQ, «ATF Bank» AQ jáne «Sberbank» AQ qatysyp, 10 paıyzdyq ıpotekany berip te úlgerdi. Al «Turǵyn úı qurylys jınaq banki» AQ, «Tengri Bank» AQ, «Tsesnabank» AQ, «Bank RBK» AQ, «Nurbank» AQ pen «VTB Banki» jyldyń ekinshi jartysynda atalǵanbaǵdarlamaǵa qatysýdy kózdeıdi.
