«Nurly jer» aıasynda qansha baspana tapsyryldy

ASTANA. QazAqparat - Byltyr rekordtyq 11,2 mln sharshy metr turǵyn úı paıdalanýǵa berildi. Bul týraly 2017 jylǵy áleýmettik-ekonomıkalyq damýǵa arnalǵan baspasóz máslıhatynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.

«2017 jylǵy Indýstrııalandyrý kartasy boıynsha 1,5 trln teńgege jýyq somaǵa 120 joba engizilip, 10 myń turaqty jumys oryndary quryldy.  «Nurly jol» baǵdarlamasynyń aıasynda 4 myń shaqyrymnan astam jol qaıta jóndeldi. El ekonomıkasynyń sapaly ósimge jetýine «Nurly jer» baǵdarlamasyn júzege asyrý óz úlesin qosyp otyr. Sonyń arqasynda rekordtyq 11,2 mln sharshy metr turǵyn úı paıdalanýǵa berildi. Bul óz kezeginde 100 myńnan astam otbasy jańa baspana alǵanyn bildiredi», - dedi R. Dálenov Ortalyq kommýnıkatsııalar qyzmetinde.

Sonymen qatar byltyr ekpin qoıylyp otyrǵan salalarda ilgerileý boldy. Bul rette farmatsevtıka - 42 paıyzǵa, al kólik qurastyrý - 39 paıyzǵa, jeńil ónerkásip 7,3 paıyzǵa artty. Jalpy, 2017 jyly ınflıatsııa turaqtandy. Makroekonomıkalyq jaǵdaı da ońtaıly boldy.

«Byltyrǵy jyldyń qorytyndysy boıynsha Іshki jalpy ónim 4 paıyzǵa joǵarylady jáne bul kórsetikish álemdik ekonomıkanyń ósiminen joǵary. ıAǵnı álemdik ekonomıka 3,6 paıyzǵa ósken bolatyn. 2017 jylǵy basty ekonomıkalyq qorytyndyǵa toqtalsaq, ІJÓ ósiminiń úshten eki bóligi shıkizattyq emes ekonomıkamen qamtamasyz etildi. Barlyq ishki salada ósim boldy. 2016 jylǵy 22 salada, al 2017 jyly 31 salada oń ósim baıqaldy», - dedi Rýslan Dálenov.