«Nurly jer»: Aqtóbede 60 adam páterli boldy
AQTÓBE. QazAqparat - Aqtóbeniń Alǵa aýdanynda «Nurly jer» baǵdarlamasymen 60 páterli turǵyn úı paıdalanýǵa berildi, dep habarlaıdy QazAqparat tilshisi.
Alǵa qalasynda «Nurly jer» baǵdarlamasymen 5 qabatty turǵyn úı salyndy. Páterdiń bári kezekte turǵan muqtaj jandarǵa berildi. Aqtóbe oblysy ákiminiń baspasóz qyzmetiniń habarlaýynsha, 12 jetim jáne ata-anasynyń qamqorlyǵynsyz balalar men halyqtyń áleýmettik osal tobyna kiretin 48 otbasy baspanaly boldy. Bári de memlekettik turǵyn úı qorynda kezekte turǵan.
«Turǵyn úı - árbir adamnyń eń basty máselesi jáne aldaǵy jetistiginiń negizi. Sondyqtan memleket halyqty turǵyn úımen qamtamasyz etý úshin jumys istep jatyr, osy maqsatta kóptegen baǵdarlamalar qabyldandy. Olardyń qatarynda «Nurly jer», «7-20-25» baǵdarlamasy bar. Tek Aqtóbe oblysynda ótken jyly 790 myń sharshy metr turǵyn úı salyndy, bıyl keminde 870 myń sharshy metr úı turǵyzýdy josparlap otyrmyz», - dedi oblys ákimi Berdibek Saparbaev.
Alǵa aýdanynda barlyǵy 128 páter paıdalanýǵa beriledi. 2019-2020 jyldary taǵy eki kópqabatty 120 páter salynady.
