«Nurly jer»: Aqmola oblysynda 50 turǵyn úı salynýda

KÓKShETAÝ. QazAqparat - Aqmola oblysynda turǵyn úı qurylysy qarqyn alyp keledi. Sońǵy úsh jyldyń ishinde óńirde memlekettik baǵdarlamasy sheńberinde 1,5 mıllıon sharshy metr baspana salynyp, 13 myń otbasy baspana máselesin sheshti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Turǵyn úı qurylysyn júzege asyrý úshin 2020-2025 jyldarǵa arnalǵan «Nurly jer» baǵdarlamasynyń birinshi baǵytynda qarastyrylǵan. Bıylǵy jyly birinshi baǵytty júzege asyrý úshin respýblıkalyq jáne oblystyq bıýdjetten 11,5 mıllıard teńge qarjy qarastyryldy. Búgingi kúni 504 myń sharshy metr baspana nemese 4 100 páter paıdalanýǵa berildi.

«Oblysta «Nurly jer» memlekettik baǵdarlamasy boıynsha 50 turǵyn úı, «Jumyspen qamtýdyń jol kartasy» baǵdarlamasy sheńberinde 45 turǵyn úı, «Іri qalalardyń tysqary aýmaqtaryn damtý» baǵdarlamasy boıynsha 4 turǵyn úı salynýda. Qoljetimdi baspana qurylysy 14 aýdan men Kókshetaý jáne Stepnogor qalalarynda júzege asyrylýda», - oblystyq qurylys basqarmasynyń basshysy.

Osy rette, oblys ortalyǵynda qazirgi tańda 6 jaldamaly turǵyn úı salyndy. Jyl sońyna deıin taǵy 5 úı salý josparlanǵan. Budan bólek, 13 turǵyn úıdiń qurylysy júrgizilýde, onyń 5-ýi jyl sońyna deıin paıdalanýǵa beriledi.

Óńirde halyqtyń áleýmettik jaǵynan osal toptaryna 501 jaldamaly páter úlestirý josparlanǵan. Onyń ishinde 186 kópbalaly otbasylar.

Oblys turǵyndary «7-20-25» baǵdarlamasyna da belsendi qatysýda. Búgingi tańda 946 ótinish qoldaý taýyp otyr. Bıyl 175 otbasy «Baqytty otbasy» baǵdarlamasy boıynsha jeńildetilgen páterge qol jetkizdi.

Sonymen birge, oblysta áleýmettik nysandardyń qurylysyna erekshe kóńil bólinýde. Qazirgi tańda áleýmettik salada 51 joba júzege asyrylýda. Olardyń qatarynda mektep, balabaqsha, emhana, dárigerlik ambýlatorııa, dene shynyqtyrý jáne saýyqtyrý keshenderiniń qurylysy bar.