Nurly jer: Aqmola oblysynda 105 otbasy baspanaly boldy
Makınsk qalasynda «Nurly jer» baǵdarlamasy boıynsha salynǵan 45 jáne 60 páterli eki turǵyn úıden 105 otbasyna jańa páterdiń kilti saltanatty jaǵdaıda tabys etildi. Sharaǵa aımaq basshysy Ermek Marjyqpaev qatysyp, quttyqtaý sóz sóıledi.
Bul joly eki turǵyn úıdegi páterlerdiń 42-i kópbalaly otbasylarǵa, 13-i jetim balalarǵa, 50-i áleýmettik jaǵynan osal toptaǵylarǵa arnalǵan.
Merdigerlerdiń sózine qaraǵanda, turǵyn úı barlyq talaptarǵa saı salynǵan. Úıdiń mańynda avtoturaq jáne balalar alańy qarastyrylǵan. Joba boıynsha 60 páterli turǵyn úıdiń qurylysy úshin 225,6 mıllıon teńge qarjy bólinse, 45 páterli úıdi salý úshin 310,8 mıllıon teńge jumsalǵan.
Aımaq basshysy quttyqtaý sózinde Memleket basshysy baspananyń turǵyndarǵa qoljetimdi ári sapaly bolýyn udaıy nazarda ustaıtynyn jáne memlekettik baǵdarlamalardyń arqasynda kóptegen aqmolalyqtar jyl saıyn baspanaly bolyp, qýanyshqa kenelip otyrǵanyn atap ótti.
«Barshańyzdy QR Konstıtýtsııasynyń 25 jyldyǵymen quttyqtaımyn. Ata Zańymyz Táýelsizdigimizdiń basty jetistigi. Halyqtyń ál-aýqatyn kóterýdiń basty baǵyty qazaqstandyqtardy baspanamen qamtý. Osy rette, elimiz egemendigin alǵannan beri bizdiń oblysta 3 mıllıonnan astam sharshy metrden astam baspana berildi. Sońǵy bes jyl ishinde ár jyl saıyn 400 myń sharshy metr baspana berip kelemiz. Bul 1991 jylmen salystyrǵanda 10 esege kóp. 12 myńnan astam aqmolalyq baspanaly boldy, - dedi aımaq basshysy.
Jańa páterdiń kiltine ıe bolǵannyń biri – Raqymjan Ótemisov qýanyshymen bólisti.
«Búgingi qýanyshymdy sózben aıtyp jetkizý múmkin emes. Áli de ózime ózim sene alar emespin», – deıdi ol.
