«Nurly kósh» baǵdarlamasyndaǵy áleýmettik paketter «Jumyspen qamtý» baǵdarlamasynda tolyq qamtylyp otyr - T. Dúısenova
ASTANA. QazAqparat- «Nurly kósh» baǵdarlamasyndaǵy áleýmettik paketter «Jumyspen qamtý» baǵdarlamasynda tolyq qamtylyp otyr. Búgin Parlament Senatynyń jalpy otyrysynda Densaýlyq saqtaý jáne áleýmettik damý mınıstri Tamara Dúısenova osylaı málim etti.
Eske salaıyq, jalpy otyrysta «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» Zańy qabyldandy.
Aıta keterligi, qujatty talqylaý barysynda senatorlar «Nurly kósh» baǵdarlamasy sekildi baǵdarlama qabyldaý týraly másele kótergen bolatyn.
«Nurly kósh» baǵdarlamasy «Jumyspen qamtý-2020» baǵdarlamasy qabyldanǵanǵa deıingi qujat edi. Sondyqtan da, biz qazir sol burynǵy «Nurly kósh» baǵdarlamasynda qarastyrylǵan áleýmettik paketti «Jumyspen qamtý» baǵdarlamasyna engizdik. Bir ereksheligi, atalǵan áleýmettik paket oralmandar úshin ǵana emes, osynda turyp jatqan azamattar úshin de birdeı beriletin bolady. Árıne, bul rette belgili bir talaptar oryndalýy kerek. Máselen, ol azamattar Úkimet belgilegen eńbek resýrstary tapshy óńirlerge baryp, sonda qonystanyp turýy tıis», dedi T. Dúısenova.
Budan bólek, senatorlar «ońtústikten soltústikke» qonystandyrýdyń keshendi baǵdarlamasyn qabyldaý týraly máseleler kóterdi.
«Árıne, soltústik óńirlerde jumys oryndaryn ashý múmkindigine qaraı birinshi kezekte ońtústiktegi halyq tyǵyz ornalasqan eldi mekenderden soltústikke qonystandyrý qarastyrylady. Sonymen qatar, arnaıy baǵdarlama jasasaq, ol barlyq baǵdaralamada qamtylǵan dúnıelerdi qaıtalaıtyn edi. Sol úshin biz qoldanystaǵy baǵdarlamalardy osyndaı ózgeristermen tolyqtyrdyq», - dedi mınıstr.
