«Nurly kósh» baǵdarlamasy aıasynda bıyl elimizde myń úı salynady

Bul týraly búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev málim etti, dep habarlaıdy QazAqparat.

«Byltyr atalǵan baǵdarlama aıasynda Kókshetaý qalasynda 276 úı salynyp, bunyń 159-yna etnıkalyq qandastarymyz ornalasty. Aǵymdaǵy jyly Shyǵys Qazaqstan oblysynda da 200 páter qoldanysqa beriledi. Al Shymkent qalasyndaǵy «Asar» shaǵyn aýdanynda qazirgi kúni 532 turǵyn úıdiń qurylysy tolyq aıaqtaldy, qalǵan 43 úıde árleý jumystary júrgizilýde», dedi Q. Ábishev.

Onyń sózine qaraǵanda, baǵdarlama boıynsha salynyp jatqan bundaı baspanalarǵa kez-kelgen oralmandar qol jetkize almaıdy. Máselen, atalǵan joba aıasynda salynyp bitken úılerge ıelenýshi etnıkalyq qandastarymyz eńbek qabileti bolýy shart. Óıtkeni, baspanaǵa ıe bolǵan oralmandar aıyna 30 myń teńgege jýyq kredıt tóleýi shart eken.