Nurly Ertis: Pavlodarǵa 235 kópbalaly otbasy kóship keldi
«Bıyl Nur-Sultan men eńbek kúshi jetkilikti ózge de óńirlerden kópbalaly otbasylardy kóshiretin «Nurly Ertis» jobasy Prezıdent pen Úkimetten qoldaý tapty. Ekibastuz qalasyna 235 kópbalaly otbasy nemese 1303 adam kóship keldi. Olardyń arasynda 862 bala bar. Qazir eńbekke qabiletti qonys aýdarýshylar turaqty jumys istep, eńbekaqy alyp otyr», - dedi ákim Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, balalarǵa balabaqshalar men mektepterden oryn berilgen.
«Barlyq otbasy jaıly páterlerge jaıǵastyryldy. Bul baǵdarlama boıynsha ári qaraı da úı salýǵa daıynbyz. Qarjylandyrý bar. Úı turǵyzý úshin ınjenerlik toraptyq jeliler júrgizilgen, áleýmettik ınfraqurylymy bar daıyn alańdar bar», - dedi Bolat Baqaýov.
Aıta keteıik, Pavlodar oblysynyń ákimi Bolat Baqaýov elordada 2019 jyldyń 10 aıyndaǵy óńirdiń áleýmettik-ekonomıkalyq damýy týraly esep berýde. Buǵan deıin ákim óńirdiń eksporttyq áleýeti, ınvestıtsııalyq jobalary týraly baıandaǵan bolatyn.
