«Nurly bilim» uıymy teris dinı aǵymǵa ergen 60 adamdy qalaı qaıtardy?
ASTANA. QazAqparat - «Nurly bilim» qoǵamdyq birlestigi 2013 jyly bastalǵan qyzmeti aıasynda osy ýaqytqa deıin teris dinı aǵymǵa erip ketken 60 adamdy durys jolǵa qaıtarǵan. Bul týraly búgin «Din salasyndaǵy ózekti máselelerdi jarııalaý jónindegi aqparattyq jumystyń qaǵıdalary men basymdyqtary» atty din salasyndaǵy máselelerdi BAQ-ta jarııalaý boıynsha jýrnalısterge arnalǵan trenıng barysynda qoǵamdyq birlestiktiń tóraǵasy Rústem Syzdyqov málim etti.
«Ókinishke oraı, Sırııaǵa, Irakqa radıkal bolyp qaryndastarymyz ben baýyrlarymyz bilmestikpen ketip jatyr. Barlyq qatelik din týraly ǵylymı bilimniń joqtyǵynan ekenin naqty túsindirýimiz kerek. Bizdiń «Nurly bilim» uıymy 2013 jyldan beri jumys atqaryp keledi. Adasqan aǵymdardyń ókilderin ózimizdiń dástúrli baǵytqa qaıtarý maqsatyndaǵy jumystyń qorytyndysyn aıtatyn bolsam, teris aǵymǵa qosylǵan 60-qa jýyq adamdy qaıtardyq»,- degen R.Syzdyqov teris aǵymǵa ketken adamdardy jamandaý, jala jabý eshqashan eshqandaı nátıje bermeıtinin basa aıtty. Onyń aıtýynsha, mundaı adamdardyń qateligin tek qana ǵylymı formatta dáleldeý kerek. Olardyń syrtynan jaman sóz aıtyp, balaǵattaý eshqandaı nátıje bermeıdi. «Memleket basshysy aıtqandaı, biz dinı sanany qalyptastyrýymyz kerek. Dinı tájirıbe degen nárse bar, dinı sana degen nárse bar. Dinı tájirıbe degenimiz - meshitke barýǵa, oraza ustaýǵa, oramal taǵýǵa shaqyrý. Al zaıyrly memlekette, plıýarıstik qoǵamda biz tek dinı sanany qalyptastyrýmen aınalysyp jatyrmyz. Dinı sanany qalyptastyrýda halyqqa qandaı aqparat berýimiz kerek degen suraq týyndaıdy. Biz arab áleminiń, ıslam ǵalymdarynyń atyn aıtyp jatqan joqpyz, zaıyrly qoǵamǵa ol kerek te emes. Negizgi másele - Abaı men Shákárim, ulttyń teńdesi joq uly tulǵalary, ulttyń tuńǵysh ustazy Ybyraı Altynsarınniń siz ben bizge Allany qalaı taný kerek, ıman degen ne, kúpirlik degenniń ne ekenin aıtyp ketken. Osyny biz árbir qoǵamdaǵy sanaǵa jetkizetin bolsaq, bul naqty ımmýnıtet bolady», - deıdi ol. Bul rette, R.Syzdyqov BAQ ókilderi tarapynan ketetin birneshe qatelikti atap kórsetti. «Biz zaıyrly memleket bolǵanymyzben, plıýarıstik qoǵambyz. Bul qoǵamda namaz oqıtyn musylmandar, namaz oqymaıtyn musylmandar, tipti, hrıstıandar men ateıster de birdeı. Bul negizi ardaqty Paıǵambarymyz Muhammedtiń (s.a.s) qaldyrǵan negizgi ósıetterine saı keledi. Medınedegi eń tuńǵysh Konstıtýtsııanyń 64 babynda Paıǵambarymyz tuńǵysh ıslam memleketi týraly aıta otyryp, eshbir hrıstıanǵa, eshbir din ókiline eshqashan qysym kórsetpep edi. Olardy alalaǵan joq. Sony biz túsiniýmiz kerek. Sodan keıin keıbir buqaralyq aqparat quraldarynyń ókilderi «dindar musylman», «dinsiz musylman» dep jazady da, aıtady da. Bundaı termın múlde bolmaıdy, bul uǵym bir-birine qarsy bolyp turǵan túsinik», - dedi ol.
