Nurlybek Nálibaev shekara ótkizý beketterin jańǵyrtý jóninde tapsyrma berdi
ASTANA.KAZINFORM - Memleket basshysynyń shekara mańy ınfraqurylymyn damytý jónindegi tapsyrmasyn oryndaý sheńberinde Qazaqstan Respýblıkasy Premer-mınıstriniń Birinshi orynbasary Nurlybek Nálibaevtyń tóraǵalyǵymen memlekettik shekaradaǵy avtomobıl ótkizý pýnktterin jańǵyrtý máseleleri boıynsha keńes ótti. Bul týraly Úkimettiń baspasóz qyzmeti habarlady.
Keńeske kólik, qarjy, ónerkásip jáne qurylys mınıstrlikteriniń, UQK Shekara qyzmetiniń jáne «QazAvtoJol «UK» AQ ókilderi qatysty.
Keńes barysynda avtomobıl ótkizý pýnktterin qaıta jańartý jáne tehnıkalyq jabdyqtaý jobalaryn iske asyrý barysy qaraldy.
Nurlybek Nálibaev ótkizý pýnktterin jańǵyrtý eldiń tranzıttik áleýetin arttyrýdyń, baqylaýdan ótý ýaqytyn qysqartýdyń jáne azamattar men bıznes úshin qolaıly jaǵdaı jasaýdyń negizgi sharty bolyp tabylatynyn atap ótti.
Kólik mınıstrligine Ónerkásip jáne qurylys mınıstrligimen, «QazAvtoJol «UK» AQ jáne UQK Shekara qyzmetimen birlesip eskızdik jobalardy qaıta qarap, qazirgi zamanǵy qasbettik materıaldar men jolaýshylar men júkter aǵynyn uıymdastyrý jónindegi talaptardy eskere otyryp, avtomobıl ótkizý pýnktteriniń biryńǵaı dızaın-kodyn bekitý tapsyryldy.
Jaýapty memlekettik organdar men uıymdarǵa jobalardy iske asyrý merzimderine, qurylys jumystarynyń sapasyna baqylaýdy kúsheıtý jáne tikeleı nysandardaǵy jańǵyrtý barysyna turaqty monıtorıng júrgizý jóninde tapsyrmalar berildi.
Avtomobıl ótkizý pýnktterin tolyq aýqymdy jańǵyrtý ótkizý qabiletin birneshe esege ulǵaıtýǵa, shekaralyq jáne kedendik baqylaýdan ótý ýaqytyn qysqartýǵa, sondaı-aq syrtqy ekonomıkalyq qyzmetke qatysýshylar úshin qazirgi zamanǵy jáne qaýipsiz jaǵdaılar jasaýǵa múmkindik beredi.
Avtomobıl ótkizý pýnktterin jańǵyrtý jobalaryn iske asyrý Qazaqstan Respýblıkasy Úkimetiniń erekshe baqylaýynda.
Aıta ketelik aqyly joldardaǵy abonementtiń baǵasy jáne ony alý joldary qandaı ekenin jazǵan edik.
