Nurlybek Nálibaev Zaısanda salynyp jatqan áýejaı qurylysymen tanysty

Shyǵys Qazaqstan oblysyna jumys saparymen kelgen Úkimet basshysynyń birinshi orynbasary Nurlybek Nálibaev Prezıdent tapsyrmasymen Zaısan aýdanynda salynyp jatqan áýejaı qurylysyn baqylady. Merdiger kompanııa — «ELHON» JShS. Búginde áýejaıdyń daıyndyq deńgeıi 85%-ǵa jetken.

Kireberis jol, ınjenerlik jeliler men sý qubyry salynyp, ushý-qoný jolaǵy, rýldeý joly, perron jáne drenaj júıesiniń qurylysy máresine jetken. Komandalyq-dıspetcherlik pýnkt pen ákimshilik ǵımarat salynyp jatyr. Sol jerde 330-ǵa jýyq adam men 87 arnaıy tehnıka jumys isteýde. 

— Eń bastysy — sapa. Sebebi Shyǵystaǵy eki áýejaıdyń qurylys barysy Memleket basshysynyń tikeleı baqylaýynda. Úkimet basshysynyń tapsyrmasy boıynsha men de arnaıy kelip otyrmyn. Erteń bul áýejaı el ıgiligine uzaq jyldar qyzmet etetin bolady, al jaýapkershiligin de, alǵysyn da ózimiz alamyz. Sol sebepti de búginnen bastap ár jumystyń sapasyna jaýapkershilikpen qaraý qajet, — dedi Nurlybek Nálibaev.

Sondaı-aq Úkimet basshysynyń birinshi orynbasary qurylys barysynda qoldanylatyn materıaldardyń sapasyn turaqty baqylaýda ustaýdy tapsyrdy.

Eske salsaq, osyǵan deıin Premer-mınıstrdiń birinshi orynbasary ShQO-daǵy birqatar mańyzdy nysandy aralaǵany habarlanǵan.