Nurlybek Nálibaev Petropavldaǵy birqatar strategııalyq nysandardy aralady
ASTANA.KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaev jumys sapary aıasynda Soltústik Qazaqstan oblysyna baryp, óńirde júzege asyrylyp jatqan ónerkásiptik, ınfraqurylymdyq, energetıkalyq jáne agrarlyq jobalardyń barysymen tanysty. Bul týraly Úkimet málim etti.
Petropavl qalasynda Nurlybek Nálibaev transformatorlar men elektrotehnıkalyq jabdyqtardyń quramdas bólikterin óndirýge mamandanǵan «Petropavl elektrotehnıkalyq zaýyty» JShS-nyń jumysymen tanysty. Jobanyń jalpy quny 10 mlrd teńgeni quraıdy. Kásiporynda 200 jańa jumys orny ashylǵan. Óndiris qýaty jylyna 13 myń dana ónim shyǵarýǵa múmkindik beredi.
Sonymen qatar Qazaqstan Respýblıkasy Premer-mınıstriniń birinshi orynbasary óńirdegi temirjol jyljymaly quramyn óndiretin iri mashına jasaý kásiporyndarynyń biri «ZIKSTO» JShS qyzmetimen tanysty. 2025 jyly munda jalpy aýmaǵy 12 myń sharshy metrdi quraıtyn jańa zaýyttyń qurylysy aıaqtalyp, robottandyrylǵan zamanaýı tehnologııalyq jeli iske qosylǵan bolatyn. Jobanyń jalpy quny 25 mlrd teńgeni qurady, 300 jańa jumys orny ashyldy.
Jumys sapary barysynda CLAAS aýyl sharýashylyǵy tehnıkasyn qurastyrý zaýyty, «Maslo-Del» JShS maı ekstraktsııalaý zaýyty, «Zelenyı Sever» JShS jylyjaı kesheni jáne «Petropavl aýyr mashına jasaý zaýyty» AQ-da boldy. Atalǵan jobalar óńirdiń ónerkásiptik jáne agroónerkásiptik áleýetin nyǵaıtýǵa, shıkizatty tereń óńdeýge baǵyttalǵan.
Sapar barysynda energetıkalyq qaýipsizdik máselelerine de erekshe nazar aýdaryldy. Petropavl JEO-2 nysanynda Premer-mınıstrdiń birinshi orynbasary 2026–2027 jyldardaǵy jylytý maýsymyna daıyndyq barysy, jóndeý jáne ınvestıtsııalyq baǵdarlamalardyń júzege asyrylý barysymen tanysty. Kásiporynnyń bas dırektory Anatolıı Kazanovskııdiń aıtýynsha, keıingi jyldary stansadaǵy tehnologııalyq buzýshylyqtar sany aıtarlyqtaı tómendegen.
— 2022 jyly kásiporynda 103 tehnologııalyq buzýshylyq tirkelgen bolatyn. Aýqymdy jóndeý baǵdarlamalarynyń nátıjesinde 2024–2025 jyldary bul kórsetkish 55-ke deıin tómendedi, al ótken jylý berý maýsymynyń qorytyndysy boıynsha tek 23 jaǵdaı tirkeldi. Qazirgi ýaqytta jańa jylytý kezeńine daıyndyq qarqyndy júrgizilýde. 2025 jyly ınvestıtsııalyq baǵdarlamanyń kólemi 15 mlrd teńgeni qurasa, bıyl bul maqsatqa 16,2 mlrd teńge qarastyrylǵan, — dedi Anatolıı Kazanovskıı.
Nurlybek Nálibaev Petropavl qalasyndaǵy Ýnıversalnaıa kóshesindegi jol ótkeli qurylysynyń jobasymen tanysty. Búginde nysan 90%-ǵa daıyn. Budan bólek, Premer-mınıstrdiń birinshi orynbasary Pestroe kóli jaǵalaýyndaǵy eko-parkke bardy. Joba rekreatsııalyq ınfraqurylymdy damytýǵa, ishki týrızmdi qoldaýǵa jáne qalalyq ortanyń sapasyn arttyrýǵa baǵyttalǵan.
— Eko-park — turǵyndar men balaly otbasylar úshin qolaıly demalys orny. Munda velojoldar men jaıaý júrginshiler aımaqtary qarastyrylyp, halyqtyń jaıly demalýyna barlyq jaǵdaı jasalǵan. Memleket basshysy atap ótkendeı, qalalar taza ári ómir súrýge qolaıly bolýy tıis. Petropavlda halyq ıgiligi úshin aýqymdy jumystar atqarylýda. Endigi mindet — jobany sapaly aıaqtap, osyndaı bastamalardy júıeli túrde jalǵastyrý, — dedi Nurlybek Nálibaev.
Odan keıin Nurlybek Nálibaev Novonıkolskoe aýylyndaǵy «Zenchenko ı K» KS-niń zamanaýı taýarly sút fermasyna bardy. Zamanaýı nysan 8 myń basqa arnalyp «Karýsel» qondyrǵysymen jabdyqtalǵan. Jobanyń jalpy quny 9 mlrd teńgeni quraıdy, al óndiris orny 2026 jyldyń tamyz aıynda iske qosylady dep josparlanýda.
Búginde «Zenchenko ı K» KT bıznestiń áleýmettik jaýapkershiliginiń úlgisin kórsetip keledi. Kásiporyn qarajaty esebinen Novonıkolskoe aýylynda turǵyn úıler men áleýmettik nysandar salynyp jatyr. Sońǵy bes jylda áleýmettik jaýapty bıznes aýyl turǵyndarynyń ál-aýqatyn arttyrý úshin 3,2 mlrd teńgeden astam qarjy baǵyttady.
Atalǵan jobalardyń júzege asyrylýy Soltústik Qazaqstan oblysynyń ónerkásiptik jáne agrarlyq áleýetin nyǵaıtyp, jańa jumys oryndaryn ashýǵa, ınfraqurylymdy jańǵyrtýǵa jáne halyqtyń ómir súrý sapasyn jaqsartýǵa múmkindik beredi.
