Nurlybek Nálibaev Pavlodar oblysyndaǵy iri ónerkásip jáne energetıka jobalarymen tanysty
ASTANA. KAZINFORM – Premer-mınıstrdiń birinshi orynbasary Nurlybek Nálibaev Pavlodar oblysyna jasaǵan jumys sapary barysynda óńir ákimi Asaıyn Baıhanovpen birge Ekibastuz qalasyndaǵy birqatar iri ónerkásiptik jáne energetıkalyq kásiporyndy aralady. Bul týraly Úkimettiń baspasóz qyzmeti habarlady.
Búginde Prezıdent Qasym-Jomart Toqaevtyń tikeleı tapsyrmasymen, Úkimettiń jiti baqylaýymen aımaqtaǵy iri óndiris oryndaryna ınvestıtsııa tartý, qalanyń áleýmettik ınfraqurylymyn damytý jáne ınjenerlik-kommýnaldyq keshendi jańǵyrtý jumystary júrgizilip jatyr.
Sapar aıasynda Nurlybek Nálibaev elimizdegi eń iri kómir óndirýshi kásiporyn – «Bogatyr Kómir» JShS qyzmetimen tanysty. Kásiporyn Qazaqstandaǵy jalpy kómir óndirisiniń shamamen 38%-yn qamtamasyz etedi. «Bogatyr» jáne «Severnyı» kenishteriniń jyldyq óndiristik qýaty 42 mln tonna, munda 6,5 myńnan astam adam eńbek etedi, olardyń ortasha aılyq jalaqysy 750 myń teńgeden asady. 2032 jylǵa deıin jalpy ınvestıtsııa kólemi 360 mlrd teńge bolatyn keshendi damý josparyn júzege asyrý kózdelgen.
Budan soń Premer-mınıstrdiń birinshi orynbasary Ekibastuz jylý elektr ortalyǵyndaǵy «Energy Solutions Center» JShS jańǵyrtyp jatqan stansa qyzmetin jáne «70/30» baǵdarlamasy aıasynda generatsııalaý qýatyn arttyrýǵa baǵyttalǵan ınvestıtsııalyq jobanyń júzege asyrylý barysyn qarady. Nurlybek Nálibaev josparlanǵan barlyq is-sharany ýaqytyly oryndaý, jabdyqtardy jańartý jáne jylýmen jabdyqtaý júıesin jetildirýdiń mańyzdylyǵyn atap ótti.
Sapar aıasynda Úkimet múshelerinen quralǵan delegatsııa Railways Systems KZ tobynyń kásiporyndaryn aralap kórdi. Railways Systems KZ – temirjol kóligin jasaıtyn Qazaqstandaǵy eń iri holdıng. Kásiporyn ishki naryqtyń suranysyn qamtamasyz etip qana qoımaı, ónimderin TMD jáne EAEO elderine de eksporttaıdy.
Premer-mınıstrdiń birinshi orynbasary qazaqstandyq úlesti arttyrý, qosylǵan quny joǵary ónim óndirisin keńeıtý qajet ekenin aıtty. Sapar barysynda salalyq mınıstrlikterge, «Samuryq-Qazyna» AQ, «Qazaqstan temir joly» UK» AQ, damý ınstıtýttary jáne ózge de múddeli uıymdarǵa 2035 jylǵa deıingi temirjol jyljymaly quramyn óndirý men jetkizýdiń uzaqmerzimdi josparyn bekitý, otandyq óndirýshilermen uzaqmerzimdi kelisimsharttar jasaý, sondaı-aq jyljymaly quramdy satyp alý men kásiporyn qyzmetkerlerine turǵyn úı salýdy qarjylandyrý tetikterin ázirleý jóninde tapsyrma berildi.
Sondaı-aq Premer-mınıstrdiń birinshi orynbasary «Mineral Product International» JShS, «Kazferro Limited» JK jáne «EkibastuzFerroAlloys» JShS júzege asyryp jatqan ferroqorytpa óndiristerin salý jobalarymen tanysty. Atalǵan jobalardy júzege asyrý metallýrgııa salasyndaǵy ónim óndirisin edáýir ulǵaıtýǵa, jańa jumys oryndaryn ashýǵa jáne elimizdiń eksporttyq áleýetin nyǵaıtýǵa múmkindik beretinine nazar aýdaryldy.
Sonymen qatar jalpy quny 330 mlrd teńgeden asatyn jańa ferroqorytpa óndiristerin salý jobasy da qaraldy. Kásiporyndar jobalyq qýatyna shyqqannan keıin jylyna shamamen 460 myń tonna ferroqorytpa óndiretin bolady. Nátıjesinde 2 myńǵa jýyq jańa jumys orny ashylyp, ónim ishki naryqpen qatar eksportqa da baǵyttalady.
Premer-mınıstrdiń birinshi orynbasary Ekibastuz MAES-2 stansasyna baryp, óńirdiń energetıkalyq áleýetin aıqyndaıtyn jobalarmen tanysty. Nurlybek Nálibaev energetıkalyq qaýipsizdikti qamtamasyz etý memlekettik saıasattyń basym baǵyttarynyń biri ekenin jetkizdi. Ol barlyq jobany ýaqytyly júzege asyrý, jańa energetıkalyq nysandar qurylysyn belgilengen merzimde aıaqtaý jáne óndiristik qýatty ýaqytyly paıdalanýǵa berýdi tapsyrdy.
Úkimet sý salasyndaǵy jobalardyń oryndalýyn qatań baqylaýǵa alatynyn jazǵan bolatynbyz.
