Nurlybek Nálibaev otyn-energetıka keshenin damytý máseleleri jóninde keńes ótkizdi
ASTANA. KAZINFORM — Premer-mınıstrdiń birinshi orynbasary Nurlybek Nálibaev Memleket basshysynyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda bergen tapsyrmalary sheńberinde otyn-energetıka keshenin damytý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
Jıynda jańa qýat kózderin iske qosý, eldi mekenderdi gazben qamtý, energetıkalyq jáne kommýnaldyq ınfraqurylymdy jańǵyrtý josparlary qaraldy.
Energetıka mınıstrligine jańa qýat kózderin ýaqtyly iske qosý jáne elektr stansalaryn jańǵyrtýdy baqylaýǵa alý tapsyryldy. Kómir generatsııasynyń iri jobalary – Ekibastuz MAES-3, Kýrchatovtaǵy KES, Kókshetaý, Semeı, Óskemen qalalaryndaǵy jańa JEO-lardy júzege asyrýǵa erekshe nazar aýdaryldy.
2035 jylǵa deıingi energetıkalyq teńgerimdi ózektendirý kezinde jasandy ıntellekt salasyndaǵy jobalar men derekter ortalyqtary tarapynan týyndaıtyn elektr energııasyna qosymsha suranysty eskerý qajet.
Óńirlerdi gazdandyrý boıynsha turǵyndar sany eń kóp eldi mekenderge basymdyq berýge, sondaı-aq tutynýshylardy gaz jelilerine qosý múmkindikterin odan ári keńeıtýge basa nazar aýdaryldy.
Infraqurylymdy damytý qorynyń qarajaty esebinen qarjylandyrylatyn kommýnaldyq ınfraqurylymdy jańǵyrtý jobalary boıynsha ákimdikter qujattamany ýaqtyly daıyndaýy, saraptamadan ótýdi qamtamasyz etýi, merdigerlerdi anyqtaýy qajet. Bul rette basty nazar qurylys merzimi men sapasynyń saqtalýyna, qarajattardyń maqsatty jumsalýyna aýdarylýy tıis.
Keńes qorytyndysy boıynsha memlekettik organdar men uıymdardyń birinshi basshylarynyń qoıylǵan mindetterdi oryndaǵanyna qatysty, sondaı-aq nysandardy paıdalanýǵa ýaqytyly berýdegi derbes jaýapkershiligi atap ótildi.
Aıta keteıik, Qazaqstan atom energetıkasyn úsh esege arttyrý bastamasyn qoldady.