Nurlybek Nálibaev Qytaıda Transkaspıı baǵytyn damytý máselesin kóterdi
ASTANA. KAZINFORM- Qazaqstan Respýblıkasy Premer-mınıstriniń birinshi orynbasary Nurlybek Nálibaev Qytaı Halyq Respýblıkasy Memlekettik keńesi Premeri orynbasarynyń shaqyrýymen Qazaqstan Úkimetiniń delegatsııasyn bastap Beıjiń qalasyna jumys saparymen baryp, «Jahandyq ornyqty kólik forýmyna» qatysty.
Forýmnyń saltanatty ashylý rásiminde Nurlybek Nálibaev Qazaqstannyń kólik salasyn damytýdaǵy basym baǵyttaryn, halyqaralyq mańyzy bar ınfraqurylymdyq jobalardy, Qazaqstan men Qytaı arasyndaǵy júk tasymaly kóleminiń turaqty ósimin jáne kólik-logıstıka salasyndaǵy ekijaqty yntymaqtastyqtyń jańa múmkindikterin tanystyrdy.
Sapar baǵdarlamasynyń mańyzdy bóligi – QR Premer-mınıstriniń birinshi orynbasarynyń QHR Memlekettik keńesi Premeriniń orynbasary, Qazaqstan – Qytaı Yntymaqtastyq komıtetiniń teń tóraǵasy Dın Sıýesıanmen alǵashqy ekijaqty kezdesýi boldy.
Kezdesýde taraptar eki eldiń saýda-ekonomıkalyq yntymaqtastyǵyn keńeıtý, aýyl sharýashylyǵy men joǵary tehnologııalar salalaryndaǵy jáne óńiraralyq baılanystardy damytý, ınvestıtsııalyq ózara is-qımyldy jandandyrý, transshekaralyq ózender máselelerine, Qazaqstan – Qytaı Yntymaqtastyq komıtetiniń qyzmetine, ekijaqty yntymaqtastyqtyń basqa da ózekti baǵyttaryna nazar aýdardy.
Nurlybek Nálibaev Transkaspıı halyqaralyq kólik baǵytyna (THKB) arnalǵan joǵary deńgeıdegi sessııada sóz sóıledi.
Atalǵan sessııaǵa QHR Búkilqytaılyq halyq ókilderi jınalysy Turaqty komıteti tóraǵasynyń orynbasary Shohrat Zakır, Ázerbaıjan Respýblıkasy Premer-mınıstriniń orynbasary Shahın Mýstafaev jáne Qyrǵyz Respýblıkasy Mınıstrler kabıneti tóraǵasynyń orynbasary Erlıst Akýnbekov qatysyp, baıandama jasady.
Qatysýshylar THKB-nyń halyqaralyq júk tasymaly júıesindegi róli jyl saıyn artyp kele jatqanyn jáne onyń Qytaı men Eýropany baılanystyratyn mańyzdy kólik dálizine aınalǵanyn atap ótti.
Sessııadan keıin ótken forýmnyń saltanatty ashylý rásimine shet memleketterdiń úkimettik jáne mınıstrlik deńgeıdegi delegatsııalary, halyqaralyq uıymdardyń, dıplomatııalyq korpýstyń, sarapshylar qaýymdastyǵy men iskerlik toptardyń myńǵa jýyq ókili qatysty.
Sapar sheńberinde qytaılyq «China Communications Construction Company» (CCCC) prezıdenti Chjan Bınnanmen jáne «CITIC Group» kompanııasy dırektorlar keńesiniń tóraǵasy Sı Gohýamen ekijaqty kezdesýler ótti.
Taraptar Qazaqstanǵa ınvestıtsııa tartý, birlesken ınvestıtsııalyq jáne ınfraqurylymdyq jobalardy júzege asyrý, jańa salalardaǵy yntymaqtastyq múmkindikterin talqylady.
Forýmnan buryn Qazaqstan Respýblıkasynyń Qytaı Halyq Respýblıkasyndaǵy elshiliginde «CITIC Group» dırektorlar keńesiniń tóraǵasy Sı Gohýany II dárejeli «Dostyq» ordenimen saltanatty marapattaý rásimi ótti.
Qazaqstan Respýblıkasynyń Prezıdenti Qasym-Jomart Toqaevtyń atynan joǵary memlekettik marapatty Nurlybek Nálibaev tabystap, Sı Gohýanyń qazaq-qytaı dostyǵyn nyǵaıtýǵa jáne ózara tıimdi saýda-ekonomıkalyq yntymaqtastyqty damytýǵa qosqan eleýli jeke úlesin atap ótti.
Sondaı-aq «Dostyq» ordenin tabystaý qazaq-qytaı qatynastarynyń beriktigin aıqyndaıtyn taǵy bir sımvolǵa aınalyp, «CITIC Group» kompanııasymen yntymaqtastyqty odan ári keńeıtýge qosymsha serpin beretinine senim bildirdi.
Sı Gohýa Qazaqstan Respýblıkasynyń Prezıdenti Qasym-Jomart Kemelulyna joǵary memlekettik marapat úshin shynaıy alǵysyn bildirdi. Bul marapatty eki memleket basshylarynyń strategııalyq basshylyǵymen júzege asyrylyp jatqan birlesken kúsh-jigerdi, Qazaqstan men Qytaıdyń iskerlik toptarynyń ekijaqty yntymaqtastyqty nyǵaıtýǵa qosqan úlesin moıyndaý retinde baǵalady.
«CITIC Group» basshysy qazaq-qytaı qatynastarynyń erekshe sıpatyna jáne eki eldiń iskerlik toptarynyń joǵary deńgeıde qol jetkizilgen ýaǵdalastyqtardy júzege asyrýǵa, memleketter arasyndaǵy saýda-ekonomıkalyq jáne ınvestıtsııalyq ózara is-qımyldy ilgeriletýge jaýapkershilikpen qaraıtynyn atap ótti.
Osyǵan deıin Chýntsınnen Almatyǵa alǵash ret tikeleı áýe reısi ashylǵany týraly jazdyq.
