Nurlybek Nálibaev «Kegen» ótkizý pýnktine baryp, nysandy der kezinde aıaqtaýdy tapsyrdy
ASTANA. KAZINFORM – QR Premer-mınıstriniń birinshi orynbasary Nurlybek Nálibaev Almaty oblysyna jumys sapary aıasynda Kegen jáne Raıymbek aýdandarynyń jol ınfraqurylymyn jańartý jumystarymen jáne Qonaev qalasyndaǵy ákimshilik nysandardyń qurylysymen tanysty. Bul týraly Úkimettiń baspasóz qyzmeti habarlady.
Eń aldymen Kegen aýdanyndaǵy «Kegen» ótkizý pýnktine baryp, memlekettik organdar men uıymdarǵa nysandy belgilengen merzimde aıaqtaýdy tapsyrdy.
Kegen men Raıymbek aýdandaryn jalǵaıtyn avtomobıl jolyn jóndeý jumystaryn kórip, talaptardy qatań saqtaýdy, jol jabynynyń sapasyn baqylaýdy jáne kólik qozǵalysynyń qaýipsizdigin qamtamasyz etýdi mindettedi.
Memleket basshysy jol qurylysynyń sapasyn baǵalaý júıesin qaıta qaraý jáne qurylystyń barlyq kezeńinde baqylaýdy kúsheıtý týraly tapsyrma bergeni belgili. Aldaǵy ýaqytta jol sapasy jekelegen nysandardy tekserýmen ǵana shektelmeıdi, jobalaý, salý, jóndeý jáne paıdalaný kezeńderiniń barlyǵynda baǵalaýdyń naqty ári birizdi tásilderi qoldanylady.
Búginde bólingen qarajattyń maqsatty jumsalýy, joldardyń barlyq sapa standarttaryna sáıkes kelýi Úkimettiń qatań baqylaýynda. Nurlybek Nálibaev qurylys kestesin saqtaý, ınjenerlik jelilerdiń daıyndyǵyn qamtamasyz etý jáne tehnıkalyq qadaǵalaýdy kúsheıtý jóninde tapsyrma berdi. Bólingen qarajattyń tıimdi jumsalýyn baqylaý, nysandardy qurylys normalary men qaýipsizdik talaptaryna saı paıdalanýǵa berý basty nazarda bolýy tıis.
Talǵar aýdanynyń eks-basshysy Kegen aýdanyna ákim bolǵanyn jazǵan edik.
