Nurlybek Nálibaev Kazakhstan Paramount Engineering zaýytynyń jumysymen tanysty

Kásiporynda Arlan jáne Alan-2 brondalǵan dóńgelekti mashınalary, Barys jaýyngerlik brondy kóliginiń 4×4, 6×6 jáne 8×8 ólshemindegi modelderi, sondaı-aq, júzetin ári dóńgelekti Terrex-Barys-A 8×8 platformasy shyǵarylady.

Onda mamandar Nurlybek Nálibaevty brondy dóńgelekti tehnıkalardy jobalaý jáne óndirý tehnologııasy týraly habardar etti. Vıtse-premerge zaýyttyń óndiristik qýaty men tehnıkany jasaýdyń tolyq úderisi – metaldy óńdeýden, brondy kapsýlalardy daıyndaýdan bastap, sońǵy qurastyrý, júıelerdi biriktirý jáne daıyn ónimdi synaqtan ótkizýge deıingi barlyq kezeń kórsetildi.

Zaýyttyń bas ınjeneri Tólendi Jurtbaevtyń aıtýynsha, óndiris barysynda metaldy óńdeý, dánekerleý, kesý jáne korpýsty qurastyrý tárizdi jumystar atqarylady. Budan keıin tehnıka qajetti jabdyqtarmen jáne túrli júıelermen qamtamasyz etiledi.

– Áýeli arnaıy brondalǵan bolat zaýytqa tabaq metall túrinde jetkizilip, óndiristiń barlyq kezeńinen ótedi. Sonyń nátıjesinde brondy tehnıka daıyn bolady, – dedi ol.

Zaýyttyń óndiristik qýaty jylyna 500 brondy tehnıka shyǵarýǵa múmkindik beredi. Kásiporyn iske qosylǵannan beri ártúrli úlgidegi 400-den astam brondalǵan dóńgelekti tehnıka óndirilgen. Al 2028 jylǵa deıin 224 tehnıkaǵa tapsyrys berilgen.

Іs-sharada tehnıkanyń senimdiligi men qorǵanys deńgeıine erekshe nazar aýdaryldy. Kazakhstan Paramount Engineering shyǵarǵan brondalǵan mashınalar ballıstıkalyq jáne mınaǵa qarsy qorǵanys boıynsha sertıfıkattaý synaqtarynan ótken. Sondaı-aq, olardy qazaqstandyq áskerıler BUU-nyń Golan jotalaryndaǵy bitimgerlik mıssııasynda paıdalanǵan.

Kásiporyn málimetinshe, Qarýly kúshter tehnıkany 10 jyldan astam ýaqyttan beri paıdalanyp keledi. Bul aralyqta aıtarlyqtaı aqaý ne isten shyǵý jaǵdaılary tirkelmegen.

– Mınaǵa qarsy jáne ballıstıkalyq qorǵanystyń basty maqsaty – jaýyngerlik kezekshiliktegi ekıpaj músheleriniń ómirin saqtaý. Tehnıkany ázirleý men jetildirýdiń negizgi qaǵıdaty – osy, – dedi kásiporynnyń tehnıkalyq dırektor orynbasary Oljasbek Qartqojaqov.

Onyń aıtýynsha, endi negizgi maqsattardyń biri – brondy tehnıkaǵa qajetti bólshekterdi elimizde óndirý deńgeıin joǵarylatý.

– Biz óndiristi avtomattandyrýǵa, tıimdiligin arttyrýǵa, ónim sapasyn jaqsartýǵa, Qazaqstanda jasalǵan bólshekter úlesin kóbeıtýge basymdyq beremiz, – dedi ol.

Bas ınjenerdiń sózinshe, 2015 jyly iske qosylǵannan beri kásiporynnyń óndiristik jáne ınjenerlik áleýeti júıeli túrde damyp keledi. Qazirgi tańda zaýytta 400-den astam adam eńbek etedi. Olar – negizinen, jergilikti mamandar.

Sonymen qatar, búginde brondy tehnıkany eksporttaý máselesi boıynsha kelissózder júrip jatyr. Kazakhstan Paramount Engineering ókilderiniń málimetinshe, ónimge kórshiles memleketterdiń áleýetti tapsyrys berýshileri qyzyǵýshylyq tanytyp otyr.

Jalpy, Kazakhstan Paramount Engineering qorǵanys tehnıkasy, elektronıka, baılanys, mashına jasaý jáne ınjenerlik kadrlardy daıarlaý salalaryndaǵy kásiporyndardy biriktiretin Barys Dynamics kompanııalar tobynyń quramynda bar.

Odan bólek, Premer-mınıstrdiń birinshi orynbasaryna holdıngtiń elektrondy-optıkalyq keshender, radıolokatsııalyq stantsııalar, baılanys quraldary, robottandyrylǵan platformalar jáne jaýyngerlik modýlder salasyndaǵy jobalary tanystyryldy. Olardyń keıbirinde qazaqstandyq bólshekterdiń úlesi 70%-dan asady.

Zaýyttan attanarynda Nurlybek Nálibaev otandyq qorǵanys-ónerkásip keshenin odan ári damytý, jergilikti bólshekter óndirisin keńeıtý, zamanaýı tehnologııalardy engizý jáne eldiń ınjenerlik áleýetin nyǵaıtýdyń mańyzdylyǵyn atap ótti.

Aıta keteıik, buǵan deıin Túrkııa brondy kólikterin elektrli qozǵaltqyshqa kóshire bastaǵanyn jazǵanbyz.