Qazaqstanda quny 100 mln eýrodan asatyn sýtegi óndirý jobasy salynady
ASTANA. KAZINFORM — Premer-mınıstrdiń birinshi orynbasary Nurlybek Nálibaev QR Prezıdenti janyndaǵy Sheteldik ınvestorlar keńesiniń 38-shi plenarlyq otyrysy aıasynda Air Liquide, Wabtec jáne Alstom kompanııalarynyń basshylarymen kezdesip, Qazaqstandaǵy ınvestıtsııalyq jobalardy iske asyrý jáne ónerkásip, temirjol mashına jasaý men joǵary tehnologııalar salasyndaǵy yntymaqtastyqty keńeıtý máselelerin talqylady. Bul týraly Úkimet málim etti.
Qazaqstan Respýblıkasy Premer-mınıstriniń birinshi orynbasary Nurlybek Nálibaev QR Prezıdenti janyndaǵy Sheteldik ınvestorlar keńesiniń 38-shi plenarlyq otyrysyna qatysý úshin kelgen «Air Liquide» tobynyń Afrıka, Taıaý Shyǵys, Úndistan jáne Ortalyq Azııa óńirleri boıynsha klasteriniń prezıdenti Nıkolıa Pýaromen, «Wabtec» kompanııasynyń bas atqarýshy dırektory Rafael Olınmen jáne «Alstom» kompanııasynyń bas atqarýshy dırektory Martın Vojýrmen birqatar ekijaqty kezdesý ótkizdi.
Nurlybek Nálibaev kezdesýge qatysýshylardy Úkimettiń ınvestıtsııalyq ahýaldy jaqsartý, bıznes-qoǵamdastyqty qoldaý jáne jańa ekonomıkalyq modelge kóshý baǵytyndaǵy júıeli jumysy týraly habardar etti. Ónerkásiptik áleýetti damytý, ınfraqurylymdy jańǵyrtý jáne joǵary tehnologııalardy tartý el úshin negizgi basymdyqtar bolyp tabylatyny atap ótildi. Osy turǵyda kelissózder barysynda birlesken bastamalardyń aǵymdaǵy jaı-kúıi men seriktestikti nyǵaıtý qaraldy.
«Air Liquide» klasteriniń prezıdenti Nıkolıa Pýaromen kompanııanyń Qazaqstandaǵy júzege asyrylyp jatqan ınvestıtsııalyq jobalaryn iske asyrý máseleleri jáne ónerkásiptik gazdardy óndirý salasyndaǵy yntymaqtastyqty nyǵaıtý talqylandy. Taraptar ınvestıtsııa kólemi 100 mln eýrodan asatyn Pavlodar qalasynda sýtegi óndirý qondyrǵysyn salý jobasyna, sondaı-aq «Sılleno» JShS jobasyn tehnıkalyq gazdarmen qamtamasyz etý úshin aýa bólý stantsııasyn salý jónindegi jańa jobaǵa erekshe nazar aýdardy. Premer-mınıstrdiń birinshi orynbasary «Air Liquide» kompanııasy zamanaýı tehnologııalardy engizip otyrǵan Qazaqstannyń senimdi seriktesi ekenin atap ótti.
Rafael Olın myrza bastaǵan «Wabtec» kompanııasynyń basshylyǵymen kezdesýde birlesken jumystyń joǵary nátıjeleri, onyń ishinde Astanadaǵy magıstraldyq teplovozdar shyǵaratyn «Lokomotıv qurastyrý zaýyty» AQ-nyń tabysty qyzmeti atap ótildi. Óndiristi oqshaýlaý deńgeıin arttyrýǵa, servıstik ınfraqurylymdy damytýǵa jáne otandyq lokomotıv qurastyrý salasynyń eksporttyq áleýetin keńeıtýge erekshe kóńil bólindi.
Premer-mınıstrdiń birinshi orynbasary jáne Martın Vojýr myrza bastaǵan «Alstom» kompanııasynyń basshylyǵymen temirjol mashınasyn jasaý, tsıfrlyq sheshimder salasyndaǵy yntymaqtastyqtyń ózekti máselelerin jáne jańa birlesken jobalardy iske asyrýdyń keleshegin talqylady. Astanadaǵy «Elektrovoz qurastyrý zaýyty» JShS-nyń qyzmeti qaralyp, kompanııanyń salany damytýǵa qosqan úlesi, sondaı-aq kásiporynnyń óndiristik áleýetin odan ári arttyrý, eksporttyq jetkizilimderdi damytý jáne óndiristi oqshaýlaý deńgeıin kóterý jónindegi josparlary ataldy.
Kezdesýler qorytyndysy boıynsha ınvestıtsııalyq yntymaqtastyqty nyǵaıtýǵa jáne ónerkásiptik kooperatsııany keńeıtýge ózara múddelilik rastaldy. Qazaqstan Úkimeti temirjol salasyn damytýǵa, ozyq tehnologııalardy engizýge jáne strategııalyq seriktestikti nyǵaıtýǵa baǵyttalǵan uzaq merzimdi birlesken bastamalardy iske asyrýǵa jan-jaqty qoldaý kórsetýge daıyn ekenin atap ótti.
Buǵan deıin Úkimette Qazaqstanda mıneraldyq shıkizatty tereń óńdeý, akkýmýlıatorlyq batareıalar, energııa jınaqtaý júıeleriniń óndirisi jáne paıdalanylǵan akkýmýlıatorlardy qaıta óńdeý salalaryndaǵy ınvestıtsııalyq jobalardy júzege asyrý perspektıvalary talqylandy.
