Nurlybek Nálibaev Almaty áýejaıyn jańǵyrtý qarqynyn synǵa aldy
ASTANA. KAZINFORM – Nurlybek Nálibaev Almaty qalasyndaǵy kólik-logıstıkalyq, energetıkalyq, ındýstrııalyq jáne týrıstik jobalarmen tanysty. Bul týraly Úkimettiń baspasóz qyzmeti habarlady.
Premer-mınıstrdiń birinshi orynbasary Nurlybek Nálibaev Almaty qalasyna jumys sapary barysynda megapolıstiń negizgi kólik-logıstıkalyq, energetıkalyq, ındýstrııalyq jáne týrıstik nysandaryn aralady. Oǵan qala ákimi Darhan Satybaldy, oblys ákimdiginiń basshylyǵy, sondaı-aq nysandarǵa jaýapty vedomstvolar men salalyq uıymdardyń ókilderi qatysty.
Nurlybek Nálibaev aldymen Almaty áýejaıynda bolyp, nysannyń ınfraqurylymyn damytý jobalarynyń jaı-kúıimen, sonyń ishinde perron ǵımaraty, ushaqtardy muzdan tazartý alańy, jańa júk turaqtary qurylysymen jáne ishki reıster termınalynyń rekonstrýktsııasymen tanysty.
Almaty áýejaıy jańa halyqaralyq termınalynyń jalpy aýmaǵy — 56 myń sharshy metr, 93 mlrd teńge ınvestıtsııa salynǵan nysannyń ótkizý qýaty jylyna 14 mln jolaýshyǵa ósken. 2024 jyldyń maýsym aıynda paıdalanýǵa berilgeli beri burynǵy ǵımaratqa túsetin júkteme azaıyp, ol tolyqtaı ishki reısterge qyzmet kórsetýge kóshti.
Premer-mınıstrdiń birinshi orynbasaryna jańadan salynyp jatqan nysandar jáne aldaǵy josparlanǵan is-sharalar týraly málimet berildi. «Almaty halyqaralyq áýejaıy» AQ prezıdenti Kóse Góker baıandaǵandaı, nysandy basqarýdy qolǵa alǵan TAV Havalimanları Holding A.Ş. (TAV Airports Holding) kompanııasy byltyr tamyz aıynda jalpy somasy $360 mln bolatyn aldaǵy bes jylǵa arnalǵan bas josparyn bekitken. Onyń aıasynda termınaldardy rekonstrýktsııalaý, ushý-qoný jolaǵyn kúrdeli jóndeý, jerdegi qyzmet kórsetý jabdyqtaryn satyp alý, júk perrony jáne bortta tamaqtandyrý nysandaryn turǵyzý, qonaq úı men kóp deńgeıli parkıng salý syndy taǵy da basqa jobalar qarastyrylǵan.
Birinshi vıtse-premer Memleket basshysy Qazaqstandy aımaqtaǵy jetekshi tranzıttik ekonomıkalar deńgeıine shyǵarý mindetin qoıǵanyn, Úkimet bul tapsyrmany basym baǵyt retinde qarastyratynyn jáne oǵan jan-jaqty qoldaý kórsetiletinin basa aıtty.
— Búgin Úkimet basshysynyń tapsyrmasymen áýejaıdaǵy jumys barysyn kórý úshin arnaıy keldim. Almaty halyqaralyq áýejaıyn jańǵyrtý — Qazaqstandy Ortalyq Azııadaǵy negizgi avıatsııalyq habtardyń birine aınaldyrýǵa baǵyttalǵan strategııalyq sheshim. Alaıda jumys qarqyny óte baıaý. Almaty — týrıster kóp keletin, eń ásem qalamyzdyń biri. Áýejaı aýmaǵyndaǵy qalanyń kórkin buzatyn, týrısterge jaısyzdyq týdyratyn qurylys jumystaryn 1 shildege deıin aıaqtaý kerek. Kóse Góker myrza, áýejaı mańyndaǵy jolaýshylardyń, týrısterdiń oryndy syn-eskertpelerine negiz bolǵan, sozylyp ketken jumystardy aıaqtaıtyn ýaqyt jetti. Týrıster aǵyny ósetin jaz mezgili qarsańynda jańǵyrtýdyń qarqynyn da arttyryńyzdar, halyqtyń jaǵdaıyn nazarǵa alyńyzdar. Al qala ákimdigi jańǵyrtý jumystarynyń sapasy men der ýaqytynda bitýin qatań baqylaýda ustaýy tıis, — dep atap ótti Nurlybek Nálibaev.
Sondaı-aq Almaty áýejaıynyń halyqaralyq termınalyn taıaýda nóser jańbyr saldarynan sý basý oqıǵasyna arnaıy toqtaldy. Bul jaǵdaı qoǵamda keń rezonans týdyryp, qala turǵyndary men sheteldik qonaqtar arasynda jaǵymsyz reaktsııaǵa sebep boldy. Osy rette Premer-mınıstrdiń birinshi orynbasary jumystyń basty ólshemi — sapa ekenin eskertip, Almaty qalasynyń ákimdigine áýejaıdyń kólik ınfraqurylymyn qalalyq qoǵamdyq kólik jelisimen, sonyń ishinde metronyń perspektıvalyq baǵytymen ıntegratsııalaýdy tapsyrdy.
Aıta ketelik áýejaılarda kıberqylmysqa qarsy aqparattyq naýqan uıymdastyrylatyny týraly jazǵan edik.
