Nurlybek Nálibaev Aqtóbe oblysyndaǵy iri ınfraqurylymdyq jáne áleýmettik jobalarmen tanysty
ASTANA. KAZINFORM – Premer-mınıstrdiń birinshi orynbasary Nurlybek Nálibaev Aqtóbe oblysyna jumys saparymen baryp, kólik ınfraqurylymy, ónerkásip, turǵyn úı-kommýnaldyq sharýashylyq, tsıfrlandyrý salalaryndaǵy jobalardy jáne áleýmettik nysandar qurylysymen tanysty. Bul týraly Úkimettiń baspasóz qyzmeti habarlady.
Memleket basshysynyń qoldaýymen júzege asyrylyp jatqan jobalar eń aldymen halyqtyń jaıly turmysyn, óńirdiń áleýmettik-ekonomıkalyq órkendeýin kózdeıdi. Aýqymdy jumystardyń barlyq kezeńi, máseleleri Premer-mınıstrdiń tikeleı baqylaýynda.
Bıyl Aqtóbe oblysy arqyly ótetin respýblıkalyq mańyzy bar avtomobıl joldarynyń 1122,5 shaqyrymynda qurylys jáne jóndeý jumystary qarqyn alǵan. Onyń 856 shaqyrymy qaıta salynyp, sanattary ózgermek, eki kópir kúrdeli jóndeýden ótip jatyr.
Alǵashqy nysan – respýblıkalyq mańyzy bar «Aqtóbe – Qarabutaq – Ulǵaısyn» avtomobıl joly. Jalpy uzyndyǵy 262 shaqyrym, 7 merdiger 7 ýchaskege bólip salyp jatyr.
Jol jóndeýshiler endi Memleket basshysy Qasym-Jomart Toqaevtyń kúni keshe resmı túrde bastap bergen «Qyzylorda – Sekseýil», «Ulǵaısyn – Sekseýil» jáne «Beıneý – Sekseýil» avtomobıl joldarynyń qurylysyna kirisedi. Osy jerde asa aýqymdy, strategııalyq mańyzǵa ıe jobalar qurylysyn ýaqtyly aıaqtap, sapa talaptaryn saqtaý eskertildi.
– Memleket basshysy Qasym-Jomart Toqaev telekópir arqyly úsh iri avtojol jobasyn bastaýǵa ruqsat berdi. Joldardy 2029 jylǵa deıin sapaly etip aıaqtaýdy mindettedi. Sondyqtan jumysty úılesimdi uıymdastyryp, týyndaıtyn máselelerdi jedel sheshý qajet, - dedi Nurlybek Nálibaev.
Sapar barysynda «Embi – Shalqar», «Qandyaǵash – Shalqar», T.Júrgenov aýyly arqyly Qostanaı baǵytyna shyǵatyn joldardaǵy, «Álimbet» ótkizý pýnktindegi jumys aǵymy týraly málimet berildi.
Memleket basshysynyń bastamasymen qolǵa alynǵan elimizdegi 124 temirjol vokzalyn jańǵyrtý baǵdarlamasyna Aqtóbe óńirindegi 7 vokzal engen.
Aqtóbe temirjol vokzalynyń qurylys qarqynyn baǵamdaý kezinde jaýaptylarǵa sapa men merzimdi qatań saqtaý, aınaladaǵy aýmaqty keshendi túrde retke keltirý, abattandyrý, ǵımarattardyń syrtqy kelbetin birizdendirý jóninde tıisti tapsyrmalar berildi.
Jumys saparynyń ekinshi kúninde Memleket basshysynyń tapsyrmalaryn oryndaý, óńirdiń áleýmettik-ekonomıkalyq damýy, ınvestıtsııa tartý, ónerkásipti damytý máseleleri talqylanǵan jıyn ótti. Onda Aqtóbe oblysynyń áleýmettik-ekonomıkalyq damýyn jańa deńgeıge kóterý múmkindikteri talqylandy. Investıtsııalyq jobalardy ýaqytyly iske qosý, «Aqtóbe» arnaıy ekonomıkalyq aımaǵyna jańa óndirister tartý, aýyl sharýashylyǵyn qarjylandyrý jáne tehnıkalyq jańǵyrtý boıynsha naqty mindetter qoıyldy.
Ári qaraı «109» Ahýaldyq ortalyǵynda memlekettik aqparattyq júıelermen yqpaldastyrylǵan tsıfrlyq platforma, «TUK «Qazhrom» AQ Aqtóbe ferroqorytpa zaýytynda óndiristiń damý jospary tanystyryldy.
Sapar aıasynda «Aqtóbe JEO» AQ-nyń aldaǵy jylý maýsymyna daıyndyǵy da qaraldy. Jaýapty tulǵalarǵa jóndeý jumystaryn ýaqytynda aıaqtap, jylý berý maýsymyn turaqty ótkizý tapsyryldy. Jospar boıynsha daıyndyq qyrkúıekte aıaqtalýy tıis.
Aqtóbedegi «Qonys» sport saraıynyń janynan jańa demalys saıabaǵy salynyp jatyr. Aýmaǵy 1,6 gektar, serýendeý jáne júgirý jolaqtary, balalar jáne sport alańdary, amfıteatr, demalys aımaqtary qarastyrylǵan. Qazirgi tańda nysannyń qurylysy aıaqtalýǵa jaqyn. Mundaı qoǵamdyq keńistikter «Taza Qazaqstan» ekologııalyq aktsııasynyń maqsattaryna saı keledi.
Sapar sońynda Altyn Orda shaǵyn aýdanyndaǵy ekonomıkalyq-iskerlik aýmaqta júzege asyrylatyn jobalar, mýzykalyq drama teatr, 35 myń kórermenge arnalǵan jańa fýtbol stadıonynyń qurylysy tanystyryldy. Óńirde qolǵa alynǵan ınfraqurylymdyq jobalardy, barlyq nysannyń qurylys sapasyn baqylaý tapsyryldy.
Ónerkásiptik jáne ınfraqurylymdyq áleýeti joǵary aımaqtaǵy qaı jobanyń da sapaly oryndalyp, ýaqtyly el ıgiligine berilýi óte mańyzdy.
Aqtóbedegi jańa sý qubyryna qaıtarylǵan aktıvter esebinen 5 mlrd teńge bólingenin jazǵan bolatynbyz.
