Nurlybek Asylbekov SQ-Farmatsııa basqarma tóraǵasy qyzmetine keldi

ASTANA. KAZINFORM – «SQ-Farmatsııa» JShS basqarma tóraǵasy bolyp Nurlybek Ábıbullauly Asylbekov taǵaıyndaldy.

«Nurlybek Asylbekov jańa qyzmetke taǵaıyndalǵanǵa deıin Shymkent qalasynyń Densaýlyq saqtaý basqarmasyn basqardy», – delingen Densaýlyq saqtaý mınıstrliginiń habarlamasynda.

Nurlybek Asylbekov 1966 jyly 24 maýsymda dúnıege kelgen. Almaty memlekettik medıtsına ınstıtýtynyń Shymkent qalasyndaǵy fılıalyn, M.Saparbaev atyndaǵy Ońtústik Qazaqstan gýmanıtarlyq ınstıtýtyn jáne M.Áýezov atyndaǵy Ońtústik Qazaqstan memlekettik ınstıtýtyn bitirgen. «Provızor», «Zańger», «Ekonomıst» mamandyqtary boıynsha bilimi bar.

Eńbek jolyn 2000 jyly Ońtústik Qazaqstan oblysy Sozaq aýdanyndaǵy «Farmatsııa» AQ-da provızor-tehnolog jáne bas maman bolyp bastaǵan.

2002-2020 jyldary QR Densaýlyq saqtaý mınıstrliginiń Farmatsevtıkalyq baqylaý komıtetiniń Ońtústik Qazaqstan, Almaty oblystary, Almaty jáne Astana qalalary boıynsha basqarmalary men departamentterin basqardy. 2007-2009 jyldary QR Densaýlyq saqtaý mınıstrliginde bólim basshysy qyzmetin atqardy.

Sondaı-aq ár jyldary Astana qalasy Tutynýshylardyń quqyqtaryn qorǵaý komıtetinde, Densaýlyq saqtaý mınıstrliginiń Farmatsııa komıtetinde, Taýarlar men qyzmetterdiń sapasy men qaýipsizdigin baqylaý komıtetinde tóraǵanyń orynbasary laýazymdarynda eńbek etti. Sonymen qatar QR DSM Dárilik zattar men medıtsınalyq buıymdardy saraptaý Ulttyq ortalyǵy bas dırektorynyń keńesshisi boldy.

Aıta keteıik, «SQ-Farmatsııa» Biryńǵaı dıstrıbıýtordy qurý týraly sheshimdi Qazaqstan Respýblıkasy Úkimeti 2009 jylǵy 11 aqpanda qabyldady. Kompanııaǵa tegin medıtsınalyq kómek pen áleýmettik medıtsınalyq saqtandyrýdyń kepildik berilgen kólemi sheńberinde medıtsınalyq uıymdarǵa dári-dármekterdi satyp alý jáne jetkizý boıynsha biryńǵaı operator fýnktsııalary júktelgen.

Aıta keteıik, Talǵat Aldybergenov «Qazaqstan temir joly» basqarma tóraǵasy bolyp taǵaıyndaldy.