«Nurly jer» baǵdarlamasy: Aqtóbede apatty eki úı súrilip jatyr
AQTÓBE. KAZINFORM – Eki úıdi súrý jumystaryna demeýshi tartyldy. Al ondaǵy turǵyndar ózge úıge qonystandy.
Aqtóbe qalasy Eset batyr turǵyn alabynda ornalasqan bes qabatty eki úı osydan úsh jyl buryn apatty dep tanyldy. Qalalyq ákimdik birneshe ret saraptama jasatqanymen, qorytyndy ózgermedi. Sodan soń adamdardyń bári kóshirilip, is sotqa jetti. Úsh jyl boıy jabyq kópqabatty úı qazir súrilip jatyr.
- 2023 jyldyń mamyr aıynda Eset batyr turǵyn alabyndaǵy №39, №40 úıler apatty dep tanyldy. 2024 jyly osy úılerde turatyn 48 otbasy ózge kópqabatty úıge kóshirildi, al apatty úıdegi páterler memleket menshigine qaıtaryldy. Sol jyly sot protsessi boldy. Sottyń sheshimimen merdigerler keltirilgen zalaldy qala bıýdjetine ótedi. Bos turǵan úı adamdarǵa qaýip-qater týǵyzbas úshin súrip tastaý týraly sheshim qabyldandy, demeýshi izdestirildi. Nátıjesinde «Global raıs konstrakshn» kompanııasy qoldaý kórsetýge kelisim berdi. Bul kompanııa jyl sońyna deıin eki úıdi súrip tastaıdy, - dedi Aqtóbe qalalyq turǵyn úı qatynastary bóliminiń basshysy Madııar Qabyl.
Onyń aıtýynsha, jer qala ákimdiginiń menshiginde bolady. Ornyna qandaı da bir áleýmettik nysan nemese skver salynýy múmkin. Ázirge naqty sheshim qabyldanbady.
Eske salsaq, «Nurly jer» baǵdarlamasymen bes qabatty úı salynyp, 2019 jyly qoldanysqa berildi. 2023 jyly apatty dep tanylyp, is sotqa jetti.
Sot úkimimen sottalýshylar F.Janpeıisov S.Aıapbergenovtiń múlki tárkilenip, 6 jyl bas bostandyǵynan aıyrý jazasy taǵaıyndaldy. Tehnıkalyq baqylaýshylar J.Kenjebaev, R.Dosovtiń múlki tárkilenip, 5 jylǵa bas bostandyǵynan aıyrý jazasy taǵaıyndaldy.
Eki jyl buryn ákimdik súrý jumystary qashan bastalatynyn dóp basyp aıta almady.
Aıta keteıik, Aqtóbe qalasy Almaty aýdany Eset batyr turǵyn alabyndaǵy № 39 «K», № 40 «K» úılerin salýǵa sol kezderi bıýdjetten 337 mln 465 myń teńgeden astam qarjy jumsaldy.
