Nurlan Jaqypov shetelge jeke ushaqpen usha ma

ASTANA. KAZINFORM — «Samuryq-Qazyna» AQ basqarma tóraǵasy Nurlan Jaqypov shetelge jeke ushaqpen usha ma? Bul saýalǵa qor basshysy jaýap berdi. 

— Turaqty reıstermen ushamyn, ádette Air Astana-ny tańdaımyn, sebebi — bizdiń portfeldik kompanııa. Eger delegatsııalyq sapar bolsa, delegatsııa quramymen júremin, — dep jaýap berdi Nurlan Jaqypov qorda ótken brıfıngide.

BAQ ókiliniń Jet-pen ushpaısyz ba degen naqtylaý saýalyna qor tóraǵasy «joq» dedi.

— Air Astana-dan, qarapaıym Airbus ushaǵyn da ushýǵa suramaımyn. Air Astana kommertsııalyq uıym, kópshilikke ashyq kompanııa. Eger ondaı nárselermen áýestensek, uzaqqa barmaımyz. Onyń ústine Air Astana-dan Airbus ushaǵyn alý múmkin emes, sebebi kompanııada ashyqtyq pen eseptilik deńgeıi óte joǵary. Men bıznes-klaspen ushamyn, bul bizde korporatıvtik standartta bekitilgen. Sońǵy esepti kezeńde bizdiń tabysymyz 2 trln 400 mlrd teńge boldy, sondyqtan bıýdjet aıasynda áreket etemiz, odan aspaımyz, — dep tolyqtyrdy Nurlan Jaqypov.

Buǵan deıin «Samuryq-Qazyna» AQ basqarma tóraǵasy Nurlan Jaqypov «Samuryq-Qazyna» qory ekonomıkalyq ósýdiń draıveri emes, tejegishine aınaldy degen synǵa jaýap berdi. 

Keshe Májilis depýtaty Ádil Jubanov Premer-mınıstrdiń atyna saýal joldap, «Samuryq-Qazyna» qory Qazaqstan ekonomıkasynyń draıveri emes, tejeýishi dep synaǵan edi. 

Aıta keteıik, «Samuryq-Qazyna» qory qyzmetine memlekettik aýdıt júrip jatyr. Onyń nátıjesi maýsymnyń sońynda shyǵady.

Sondaı-aq qor basshysy Nurlan Jaqypov «Samuryq-Qazyna» jalpy ishki ónimniń 50-60 paıyzyn quraıdy degen aqparatty joqqa shyǵardy.