Nurlan Jaqypov: «Samuryq-Qazyna» JІÓ-niń 50-60 paıyzy degen – mıf
ASTANA. KAZINFORM – «Samuryq-Qazyna» AQ basqarma tóraǵasy Nurlan Jaqypov qordyń ekonomıkadaǵy úlesine qatysty pikir bildirdi.
- «Samuryq-Qazyna» jalpy ishki ónimniń 50-60%-y degen – mıf. Bul shyndyqqa janaspaıdy. Jalpy ishki ónim (JІÓ) degenimiz ne? Kez kelgen entsıklopedııa nemese ChatGPT jalpy ishki ónim el aýmaǵynda belgili bir kezeńde óndirilgen barlyq taýar, qyzmet pen istelgen jumystyń jıyntyq quny dep túsindiredi, - dedi Nurlan Jaqypov qorda ótken brıfıngide.
Qor tóraǵasy keltirgen málimetke súıensek, Qazaqstannyń 2024 jylǵy jalpy ishki ónimniń (JІÓ) kólemi –134 trln teńge.
- Sol kezeńdegi «Samuryq-Qazyna» AQ tabysy 16,5 trln teńge boldy, bul JІÓ-niń tek 12%-y ǵana. Alaıda atalǵan kórsetkish JІÓ-degi naqty úlesti emes, tabys kóleminiń salystyrmaly shamasy, - dep tolyqtyrdy qor basshysy.
Keshe ǵana Májilis depýtaty Ádil Jubanov Premer-mınıstrdiń atyna saýal joldap, «Samuryq-Qazyna» qory Qazaqstan ekonomıkasynyń draıveri emes, tejeýishi dep synaǵan edi.
Aıta keteıik, Úkimet basshysy Oljas Bektenov Samuryq-Qazynanyń otandyq óndirýshilerden taýar satyp alý kórsetkishin synady.
Sondaı-aq «Samuryq-Qazyna» aktsıonerlik qoǵamy kúshine engen Úkimet qaýlysynyń qordyń dıvıdend saıasatyna qalaı áser etetini týraly túsinikteme berdi.
Odan bólek «Samuryq-Qazyna» 177 mlrd teńgeniń taýary men qyzmetin sheteldik jetkizýshilerden «bir kózden» satyp alǵany týraly jazǵan edik.