Nurlan Jaqypov «Lýkoıldyń» sanktsııaǵa iligýine qatysty pikir bildirdi

ASTANA. KAZINFORM – «Samuryq-Qazyna» AQ Basqarma tóraǵasy Nurlan Jaqypov «Lýkoıldyń» sanktsııaǵa iligýine qatysty pikirin aıtty. 

– Taıaýda «Lýkoıldyń» sanktsııalyq tizimge ilikkeni týraly jańalyq shyqty. Óte kúrdeli másele. Qazirgi ýaqytta tıisti konsýltanttarmen, onyń ishinde halyqaralyq ta konsýltanttarmen «QazMunaıGazdyń» atalǵan jaǵdaıdan qalaı shyǵatynyna qatysty aýqymdy jumys júrgizilip jatyr, - dedi ol Aqordada BAQ ókilderiniń saýalyna oraı.

Onyń atap ótýinshe, «Lýkoıl» Qazaqstanda 30 jyldan astam ýaqyttan beri jumys isteıdi. Elimizde reseılik kompanııanyń úlken jobalary bar. Ol «Teńiz», «Qarashyǵanaq», «Qalamqas-Hazar» syndy ken oryndarynyń aktsıoneri sanalady. 

– Bul óte kúrdeli másele. Bir jaǵynan Qazaqstan úshin, «QazMunaıGaz» úshin «Lýkoıl» senimdi seriktes sanalady. Ekinshi jaǵynan biz – zańnamaǵa, salynǵan sanktsııalyq sharalarǵa saı jumys isteıtin adal korporatıvti azamatpyz. Sol sebepti taıaýda sanktsııalyq shekteýlerdi eskere otyryp, bul baǵyttaǵy jumysty odan ary qaraı jalǵastyrýǵa qatysty naqty sheshimder ázirleımiz, - dedi Nurlan Jaqypov. 

Buǵan deıin Energetıka vıtse-mınıstri Sanjar Járkeshov Úkimet otyrysynan keıin ótip jatqan baspasóz máslıhatynda sanktsııaǵa túsken «Lýkoıldyń» Qazaqstandaǵy jobalary týraly pikir bildirdi. 

Aıta keteıik, 22 qazanda AQSh sanktsııasyna túsken «Lýkoıl» kompanııasy ózge elderdegi úlesin jappaı satatyny habarlandy.