Nurlan Uranhaev Semeıdegi qaryzǵa batqan avtobýs parkteriniń máselesin qalaı sheshpek
Semeıde qoǵamdyq kólik máselesin sheshý úshin 126 jańa avtobýs satyp alynady. Bul týraly Abaı oblysynyń ákimi Nurlan Uranhaev Jibek Joly telearnasynyń «Ýáde» baǵdarlamasynda aıtty, dep habarlaıdy QazAqparat tilshisi.
Buǵan deıin SEMEY BUS JShS 167 mln teńge qaryzǵa batyp, jumysshylarǵa jalaqy tólenbeı, qalada qoǵamdyq kólik problemasy oryn alǵan edi.
«Bul — kóktemde de, qysta da bolǵan nárse. Semeıde jumys istep jatqan kompanııalar bıyl qosymsha 126 jańa avtobýs satyp alady. Biz barlyq kompanııalarmen jumys istep jatyrmyz. Avtobýs tasymalymen aınalysatyn kompanııalarmen sóılestik, eger halyq narazylyǵy bolsa, basqa óńirlerden jańa kompanııalardy tartamyz dep ashyq aıttyq», — deıdi oblys ákimi.
N. Uranhaevtyń aıtýynsha, qaladaǵy avtobýsta jol júrý aqysy — 80 teńge.
Múgedektigi bar jandar jáne basqa da sanattar tegin júredi. Shyǵyn tolyǵymen ótelmeıdi.
«Sol sebepti bul kompanııalarǵa bıýdjetten qosymsha sýbsıdııa beremiz. Sondyqtan olarǵa talap qoıyp otyrmyz. 1 qyrkúıekte oqý jyly bastalǵanda qoǵamdyq kólikte oryn jetispeýshiligi baıqaldy. Sebebi bir jerden 400 adam bir ýaqytta shyǵady, túste bir ýaqytta bári qaıtady. Onda da avtobýs kestesin qaıta qarap, túzetý engizip, máseleni sheshtik», — dedi Nurlan Uranhaev.
Sonymen birge, oblys ákimi 2025 jyldyń aıaǵyna deıin aýyz sý máselesi 100 paıyz sheshiletinine ýáde berdi.
Aıta keteıik, «Jibek Joly» telearnasy «Ýáde» atty jańa jobany bastady. Baǵdarlamada Úkimet músheleri, oblys pen qala ákimderi, ulttyq kompanııalardyń jetekshileri qonaq bolyp, júrgizýshiniń ótkir ári ózekti suraqtaryna jaýap beredi.
Jobanyń maqsaty — laýazymdy tulǵalardyń halyqqa bergen ýádesi men Prezıdenttiń tapsyrmalaryn oryndaý aıasynda jaýaptar alý.
Baǵdarlama saıası-ekonomıkalyq, áleýmettik jaǵdaı̆lar men mádenı-rýhanı keńistikti de qamtıdy.
Jańa jobanyń alǵashqy qonaǵy — Abaı oblysynyń ákimi Nurlan Uranhaev boldy.
