Nurlan Smaǵulov sý tasqynynan zardap shekkenderge kómek retinde 6,1 mlrd teńge jiberdi
ASTANA. KAZINFORM - Astana Group quramyna kiretin kompanııalar men Nurlan Smaǵulov Qory bárin qosqanda sý tasqynynan zardap shekkenderge kómek kórsetý úshin 6,1 mlrd teńge kóleminde qarajat bóldi.
Nurlan Smaǵulov qory sý tasqynynan zardap shekkenderge kómek kórsetý úshin 5,6 mlrd teńge mólsherinde aqshalaı qarajat bólingenin málimdedi. Qarajat ómirlik mańyzy bar ınfraqurylymdy qalpyna keltirý jáne úıleri sý tasqyny nátıjesinde búlingen nemese qıraǵan adamdardy turǵyn úılermen qamtamasyz etý úshin Batys Qazaqstan oblysyna jiberildi.
«Qazaqstan óńirlerindegi aýqymdy tasqyn elimiz úshin naǵyz syn-qater boldy. Qazaqstandyqtar TJ kezinde birigip, qıyndyqqa tap bolǵan adamdar men janýarlarǵa kómek kórsete otyryp, ózderin jaqsy jaǵynan tanytty. Sý tasqyny jaǵdaıy memleket basshysy Qasym-Jomart Toqaevtyń erekshe baqylaýynda. Bizdiń kompanııalarymyzdyń toby zardap shekken óńirlerge aqshalaı qarajat aýdaryp, gýmanıtarlyq kómek jiberip, qıyn-qystaý kezeńde alǵashqy kúnderden bastap at salysty. Biz jańalyqtardy muqııat qarap júrmiz, qazir sý sheginip jatyr jáne jaǵdaı turaqtanady dep úmittenip aıtamyz. Biraq alda adamdardy qalypty ómirge qaıtarý boıynsha úlken jumys kútip tur. Biz Qorymyz arqyly 5,6 mıllıard teńge bólýdi sheshtik. Bul qarajat qazaqstandyqtardyń ıgiligine jumsalsyn», – dedi kásipker ári metsenat Nurlan Smaǵulov.
Nurlan Smaǵulov — «Astana Motors» kompanııalaryn, MEGA SOO jelisin jáne Mycar.kz kompanııalar tobyn qamtıtyn Astana Group negizin salýshy.
2024 jylǵy 1 sáýirde «Astana Motors» kompanııasy 500 mln teńge mólsherinde tasqynnan zardap shekken adamdar úshin kómekti alǵyshqylardyń biri bolyp aýdardy.
Sonymen qatar «Astana Motors», MEGA SOO, Mycar.kz qyzmetkerleri óz bastamasymen 10 mln 421 myń teńge mólsherinde qarajat jınap berdi, bul aqshaǵa azyq-túlikter men alǵashqy qajettilik zattary satyp alyndy. Gýmanıtarlyq kómek Aqmola oblysynyń Atbasar aýdanyna jiberildi.
«Astana Motors» quramyna kiretin Chery brendi qytaılyq Chery International kompanııasymen birlese otyryp, Soltústik Qazaqstan oblysyna 50 mln teńgege balamaly gýmanıtarlyq kómek jiberdi.
