Nurlan Saýranbaev QTJ nelikten kredıtke batyp qalǵanyn túsindirdi
2030 jylǵa deıin 800-den astam jolaýshy vagonyn satyp alýǵa qarajat respýblıkalyq bıýdjetten bólinedi. Bul týraly «Qazaqstan temir joly» UK» AQ basqarma tóraǵasy Nurlan Saýranbaev aıtty, dep habarlaıdy Kazinform.
«2030 jylǵa deıin 800-den astam vagon satyp alynady. Jolaýshy tasymaly memlekettiń áleýmettik qyzmeti sanalady jáne oǵan aqsha respýblıkalyq bıýdjetten bólinedi», - dedi Nurlan Saýranbaev Úkimet otyrysynan keıin BAQ ókilderiniń saýalyna oraı.
Sonymen qatar ol kompanııanyń qarjylyq jaı-kúıine toqtaldy.
«Eger 2019 jyldy alsaq, onda negizgi strategııalyq maqsat kompanııanyń qarjylyq turaqtylyǵy boldy. Eki jyldan keıin bul másele kún tártibinen túsip qaldy. Ózektiligin joǵaltty. Sońǵy 2 jylda kirisimiz 1,3 trln teńgeden 2 trln teńgege deıin artty. Degenmen, QTJ-nyń kredıttený máselesi qalyp otyr. Óıtkeni, tarıfte kredıtti qaıtarý mólsherlemesi qarastyrylmaǵan. Jáne de qazirgi ýaqytta bizge jańa joldar salý, vagon satyp alý boıynsha qandaı mindetter júktelgenin kórip otyrsyzdar. Olar jeńildetilgen baǵamen alynady. Biraq, qalaı desek te olar QTJ kredıti retinde áser etedi. Soǵan baılanysty bizdiń kredıttenýimiz artyp keledi», - dep túsindiredi Nurlan Saýranbaev.
