Nurlan Sabyrov Syrtqy ister mınıstrligine júgingen joq – mınıstr orynbasary

ASTANA. KAZINFORM – QR Syrtqy ister mınıstriniń birinshi orynbasary Aqan Rahmettýlın qazaqstandyq stend-ap komık Nurlan Sabyrovty Reseıden deportatsııalaýǵa qatysty jeke pikirin bildirdi.

- Maǵan belgili aqparat, sol sizder biletin málimetpen birdeı. Syrtqy ister mınıstrligine Nurlan Sabyrovtan eshqandaı ótinish kelip túsken joq. Deportatsııa yqtımaldyǵy týraly habarlamalarǵa kelsek, ıá, men de BAQ-tan bildim. Onyń vızasynyń merzimi aıaqtalǵany jáne Reseıden ketýi kerek bolǵany, ıaǵnı biraz ýaqyt Qazaqstanda bolǵany týraly aqparat boldy, - dep qysqa qaıyrdy Aqan Rahmettýlın Májilis qabyrǵasynda BAQ ókilderiniń saýalyna jaýap bere turyp.

Osy oraıda Syrtqy ister mınıstriniń birinshi orynbasary joǵaryda aıtylǵan jeke pikiri ekeni, ıaǵnı vedomstvonyń atynan jasalǵan resmı málimdeme emes ekenin eskertti.

Aıta ketsek, 19 mamyrda qazaqstandyq stend-ap komık Nurlan Sabyrov Máskeýdegi Sheremetevo áýejaıynda kóshi-qon zańnamasyn buzǵany úshin ustalǵany týraly habarlaǵan edik. 

Reseılik BAQ-tyń habarlaýynsha, ol belgilengen merzimde Reseı aýmaǵynan shyǵýy tıis. Oǵan 5 myń rýbl (31 850 teńge) kóleminde aıyppul salynady.

Eske salsaq, 2022 jyly Nurlan Sabyrov qazaqtardyń TMD-daǵy bedeli jaıynda oıyn aıtqan edi.