Nurlan Orazalın: Besiktegi balanyń bolashaǵyn oılaý kerek

ALMATY. QazAqparat- Áleýmettik problemany, turmystyq jaǵdaıdy qazaq halqy birtutas bolyp jeńýi kerek. Mundaı pikirdi aqyn, Memlekettik syılyqtyń laýreaty Nurlan Orazalın bildirdi, dep habarlaıdy QazAqparat tilshisi.

Aqynnyń aıtýynsha, qazir kózge kórinbeıtin, qolǵa ustalmaıtyn, qaterli bir qubylys bar. Onyń qaıdan kelip, kimniń aıtyp jatqany belgisiz.

«Biz óte kúrdeli, qıyn kezeńde ómir súrip jatqan urpaqpyz. Eger biz kishkentaı qate jiberetin bolsaq, ol erteńgi urpaqtyń aldynan úlken jaǵdaı bolyp shyǵady. Ult bolshaǵyna qaýipti bolmaq. Qazir kózge kórinbeıtin, qolǵa ustalmaıtyn, qaterli bir qubylys bar. Onyń qaıdan kelip, kimniń aıtyp jatqany belgisiz. Demokratııalyq qundylyqty ustaı alsaq jaqsy, eger ustaı almasaq ol bizdiń birinshi jaýymyzǵa aınalady»,- deıdi ol.

Nurlan Orazalın áleýmettik problemanyń bar ekenin aıtty.

«Árıne, áleýmettik qıyndyq, turmystyq problema bar. Ol qıyndyqty Qazaq memleketi ózi birtutas bolyp jeńý kerek. Ony bizge syrttan kelip eshkim rettep bermeıdi. Ár memleket óz máselesin ózi sheshedi. Áleýmettik problema demokratııalyq jolmen, dıalogpen sheshilýi kerek edi. Alaıda, alashtyń bas qalasy Almatyda júgensizdik, tártipsizdik oryn aldy. Bul ultty azǵyrý dep esepteımin. Men búgingi jastarǵa aıtarym bári aqylmen, parasattylyqpen sheshilýi kerek. Ata-babamyz amanattap ketken berekeni saqtaýymyz qajet»,-dedi Nurlan Orazalın.

Zııaly qaýym ókili, jastardy sabyrlyqqa shaqyrdy.

«Jastar besikte jatqan balasyn, úıdegi qazynaly qarııasyn oılaýy kerek, halqynyń bútindigin, eliniń tynyshtyǵyn, ult bolshaǵyn, memlekettiń erteńin oılaýy tıis. Mundaı jolmen eshqandaı másele sheshilmeıdi. Men jastardy sabyrlyqqa shaqyramyn»,- dedi ol.

Sonymen qatar, ol bılik máseleni beıbit jolmen sheshýge tyrysyp jatqanyn tilge tıek etti.

«Bılik máseleni sheshý úshin barlyq jaǵdaıdy qarap, sheshýge tyrysyp jatyr. Memleket basshysy halyqty berekege, aqylǵa shaqyrdy. Prezıdent úndeýine qulaq asýymyz kerek»,- dedi Nurlan Orazalın.