Nurlan Ónerbaev qazaqtyń aqjaýlyqty analaryna taǵzym etti
ASTANA. QazAqparat - Búgin elordadaǵy «EKSPO Kongress» ortalyǵynda Qazaqstannyń eńbek sińirgen ártisi, ánshi, akter Nurlan Ónerbaevtyń «Júrektegi kóktem» atty án keshi ótti. Án keshi Astananyń 20 jyldyǵyna arnaldy, dep habarlaıdy QazAqparat.
«Bıyl Astananyń tórinde qanshama óner keshi ótedi. Óıtkeni, bıyl bizdiń elordamyz Astananyń 20 jyldyq mereıtoıy, qutty bolsyn aǵaıyn! Mine, osy merekeniń alǵashqysy kóktemde jadyrap, bárimizdi qýantyp kelgen analarymyzdyń merekesi», - dedi án keshi barysynda Nurlan Ónerbaev.
Sonymen qatar ol án keshine jınalǵan barlyq qaýymdy analarymyzdy aıalap, aq sút bergeni úshin, meıirimi, mahabbaty úshin taǵy da bir ret taǵzym etýge shaqyryp, kezekti ánin analarǵa arnady.
«Qazir tyńdaıtyn ánderińiz meniń búgingi keshimniń ózekti áni bolmaq. Buǵan deıin men qanshama ana týraly án aıttym. Alaıda bul ánimniń orny bólek. Óıtkeni, bul ándi ózimniń anama arnaǵym keledi. Anam arqyly búkil qazaqtyń aqjaýlyqty analaryna taǵzymym dep qabyl alyńyzdar», - degen ol «Jalǵandaǵy jalǵyzymsyń ana» dep atalatyn ándi oryndady.
Sonymen qatar, Nurlan Ónerbaev qazaq tarıhynda erlermen qatar atqa minip, elimizdi, jerimizdi qorǵaǵan arýlardyń da az bolmaǵandyǵyn basa aıta kele «Men qazaqtyń qyzdaryna qaıran qalam» dep atalatyn halyqtyń arasynda keńinen taraǵan týyndysyn oryndady.
Aıta keterligi, 2011 jyly elordada Nurlan Ónerbaevtyń shyǵarmashylyq keshi, al 2016 jyly «Qazaqstan» ulttyq arnasynyń «Sálem, Qazaqstan!» jobasy aıasynda «Aýylǵa saǵynysh» degen ataýmen kontserti ótken bolatyn. Jalpy, ánshi 2011 jyldan beri Mońǵolııadaǵy, Qytaıdaǵy qazaq qandastarymyzdy aralap, elimizdiń birneshe aımaqtarynda óner kórsetti. Al Almatydaǵy eń sońǵy shyǵarmashylyq keshi 2017 jyldyń 24 qarashasynda Respýblıka saraıynda «Saǵynysh» degen ataýmen uıymdastyryldy.
Nurlan Ónerbaevtyń úlken sahnadaǵy ánshilik, oryndaýshylyq óner joly 1986 jyldardan bastaldy. Ol «Saǵynysh», «Anashym», «Áke armany», «Qazaq qyzy», «Sulýlyq», «Aýylym», «Týǵan kún», «Saǵyndym aýyldy», «Jan aǵa», «Mahabbat kóktemi», «Qaraǵym-aı», «Aqqýym», «Tańǵy tilek», «Aq tilek», «Aı da, kún de» ánderin, sondaı-aq halyq ánderinen «Dýdaraı», «Sandýǵash», «Bir bıdaı arpa», «Úkili kámshat», «Oı kók», «Beý, aıdaı», «Bıpyl» ánderin oryndap júr. Kontserttik baǵdarlamamen Túrkııa, Italııa, Japonııa, Chehııa, Slovakııa, Marokko, Qytaı, Germanııa, Mońǵolııa elderinde boldy.
