Nurlan Ónerbaev 60 jasta: Elordada «Aıtylmaǵan bir ánim bar» atty shyǵarmashylyq kesh ótti
Atalǵan kesh Nur-Sultan qalasy ákimdiginiń qoldaýymen Elordalyq «Astana» kontsert zalynda, sanıtarlyq normalar men karantın talaptaryn saqtaı otyryp ótti, dep habarlaıdy QazAqparat.
Kontsertte Mýzykalyq jas kórermender teatrynyń ártisteri men Qazaqstannyń eńbek sińirgen qaıratkerleri Saıat Medeýov, Toqtar Serik pen Beıbit Seıdýáli, «Slavıan bazary - 2021» halyqaralyq festıvaliniń Gran-Prı ıegeri Rýhııa Baıdúkenova, «Junior Eurovision - 2020» halyqaralyq baıqaýynyń laýreaty Erjan Maksım, «Slavıan bazary - 2019» halyqaralyq festıvaliniń Gran-Prı ıegeri Ádilhan Makın, Qazaqstannyń eńbek sińirgen qaıratkerleri Qanat-Sveta Aıtbaevtar jáne basqa da óner qaıratkerleri qatysyp, qońyr daýysymen barsha qazaqtyń júregine jol tartqan ánshi N.Ónerbaevtyń oryndaýyndaǵy ánderdi shyrqady.
«Keń baıtaq qazaq eline tanytyp, tyńdarmannyń kóńil tórine kótergen, maǵan kóp ánderin syıǵa tartqan, keshegi Shámshi aǵamyzdan bastap, Nurǵısa aǵamyzdy, Áset aǵamyzdy, Keńes aǵamyzdy, sonymen qatar, tamasha jyrlarymen tyńdarmannyń júregine «mór basqan» aqyn aǵalarym Tumanbaı aǵa, Qaırat aǵam, Nursultan Álimqulov aǵam, Shómishbaı aǵam «Qaraǵym-aı» ánine qanat bitirgen aǵalarymnyń aldynda basymdy ıip taǵzym etkim keledi.
Qazaqtyń ánderi tyńdarman júreginen eshqashan óshpeýi úshin biz ánderdi qaıtalap aıtyp otyrýymyz kerek. Men osy án aıtyp kele jatqan 37-38 jylymda ózim ǵana sahnada kórermenimmen qaýyshatynmyn. Osy joly jańaǵy aty atalǵan kompozıtor, aqyn aǵa-apalarymyzdyń atyn jańǵyrtyp, búgingi jastardyń oryndaýynda ári qaraı ómirsheń bolýyn qaladym. Meniń oryndaǵan keıbir tamasha qanatty ánderim búgin jas oryndaýshylardyń meniń sahnadaǵy ini baýyrlarymnyń úzeńgiles áriptesterimniń án qorjynyna túse bastaǵanyn baıqadym. Búgingi keshke ózimniń shyǵarmashylyq keshime arnaıy shaqyrdym»- dedi, Qazaqstannyń eńbek sińirgen ártisi, Qazaqstannyń eńbek sińirgen qaıratkeri, Daryn memlekettik syılyǵynyń ıegeri Nurlan Ónerbaev.
Shara barysynda beınearhıvter kórsetilip, Mýzykalyq jas kórermender teatrynyń ártisteri teatrlandyrylǵan kórinis arqyly ánshiligimen qosa akterlik óner salasyna da qosqan úlesi, sonymen qatar erekshe qońyr únimen kóptegen halyq týyndylary óshpesteı bolyp qazaq radıosy, telearnalardyń altyn qorlarynan oryn alǵany aıtyldy. Keshke kelgen kórermen qaýymy ánshiniń ómiri men shyǵarmashylyǵymen tanysyp, halyq júreginen tereń oryn alǵan ánderin tyńdap rýhanı sýsyndap qaıtty.
