Nurlan Nyǵmatýlınniń tóraǵalyǵymen Májilistiń Bıýro otyrysy ótti
NUR-SULTAN. QazAqparat – Búgin Májilis spıkeri Nurlan Nyǵmatýlınniń tóraǵalyǵymen Palata Bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat Májilistiń baspasóz qyzmetine silteme jasap.
Májilis birinshi oqylymda depýtattar ázirlegen Qazaqstannyń sheginen tys jerge shyǵaryp jiberý kezinde ustaý merzimderin retteý máselelerine qatysty zań jobasyn qaraıdy.
Sonymen qatar, Palatanyń aldaǵy jalpy otyrysynda birqatar ratıfıkatsııalyq zań jobalary talqylanatyn bolady. Atap aıtqanda, ShYU múshe memleketter arasyndaǵy birlesken áskerı oqý-jattyǵýlar ótkizý týraly, sondaı-aq, Qazaqstan men Lıýksembýrg arasyndaǵy tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly kelisimder boıynsha zań jobalary.
Kún tártibiniń jobasynda «Notarıat týraly» zań jobasyn jumysqa alý kózdelgen. Osynyń qatarynda EAEO múshe memleketterdiń eńbekshilerin zeınetaqymen qamsyzdandyrý jáne Keden odaǵyna múshe memleketterdiń keden qyzmetteriniń Birikken alqasy týraly shartqa ózgerister engizý týraly qujattardy ratıfıkatsııalaýǵa qatysty zań jobalary bar.
