Nurlan Nyǵmatýlın Japonııanyń elshisin qabyldady
ASTANA. QazAqparat Májilis Tóraǵasy Nurlan Nyǵmatýlın Japonııanyń Qazaqstandaǵy Tótenshe jáne Ókiletti elshisi Itıro Kavabatany qabyldady, dep habarlaıdy Májilistiń baspasóz qyzmeti.
Qos taraptyń alǵashqy resmı kezdesýinde ekijaqty qarym-qatynasty odan ári tereńdetýdiń ózekti máseleleri talqylandy.
Taraptar bıyl eki el arasynda dıplomatııalyq baılanystyń ornaǵanyna 25 jyl tolǵanyna aıryqsha nazar aýdara kelip, osy ýaqyttar ishinde jetken jetistikterdi odan ári eseleı túsýdiń mańyzdylyǵyna erekshe toqtaldy.
N. Nyǵmatýlın atap ótkendeı, Qazaqstan Prezıdenti Nursultan Nazarbaev pen Japonııa Premer-mınıstri Sındzo Abe arasyndaǵy dostyq qatynastyń arqasynda eki el arasyndaǵy yntymaqtastyq búgingi kúni barlyq salada keńeıtilgen strategııalyq áriptestik deńgeıine jetti. Sonymen birge, bizdiń elderimiz ıadrolyq qarýsyzdaný jáne taratpaý, atom energııasyn beıbit maqsatqa paıdalaný, turaqty damý baǵytynda óte jaqyn seriktester.
Májilis Tóraǵasynyń pikirinshe, ekijaqty yntymaqtastyqty damytýda parlamenttik dıplomatııanyń ózindik orny bar.
Osy rette Májilis spıkeri bizdiń elimiz eń damyǵan 30 eldiń qataryna kirý maqsatyn qoıǵanyn, oǵan jetýde aldyńǵa qatarly memleketter tájirıbesiniń mańyzdylyǵyn alǵa tarta kelip, bul jolda 70 jyldyq tarıhy bar japondyq parlamentarızmniń yqpaly aıryqsha ekenin atap ótti.
Elshi óz qyzmetiniń byltyr Qazaqstan táýelsizdiginiń 25 jyldyǵynda bastalyp, bıyl qos memleket arasyndaǵy dıplomatııanyń mereıtoılyq mańyzdy kezeńimen jalǵasyp jatqanyn, árqashanda elder arasyndaǵy dostyq ári áriptestik yqpaldastyqty kúsheıtýge daıyn ekenin jetkizdi.
Kezdesý ıeleri EKSPO kórmesi tóńiregindegi qorytyndy oı-pikirlerin de nazardan tys qaldyrmady.
