Nurlan Nyǵmatýlın Jambyl oblysynyń jastarymen kezdesti
Kezdesý M.H. Dýlatı atyndaǵy Taraz memlekettik ýnıversıtetinde ótti. Oǵan Jambyl oblysyndaǵy jetekshi oqý oryndarynyń stýdentteri, jastar qozǵalysynyń kóshbasshylary jáne jas ǵalymdar qatysty.
N. Nyǵmatýlın jastarmen kezdesý barysynda bıylǵy jyl jastar úshin erekshe kezeń ekenine toqtaldy.
«Prezıdentimiz Jastar jylynda jas qazaqstandyqtardy qoldaýdyń naqty joldaryn usynyp otyr. Ol - eń aldymen, jas otbasylarǵa arnalǵan baspana máselesi. Memleket basshysy iri qalalarda jumys isteıtin jastar úshin jylyna bir myń páterden kem emes qurylysty qamtamasyz etýdi jáne barlyq kásiporyndarǵa jas qyzmetkerler úshin baspana jaǵdaıyn jasaýǵa belsene qatysýdy tapsyrdy», - dedi Palata spıkeri.
Májilis tóraǵasy Memleket basshysynyń jastarǵa kórsetken qamqorlyǵy týraly aıtyp, jastar belsendiligin arttyrý jolynda eńbek qabiletimen qatar, densaýlyq, rýhanı máseleler de árqashan basty nazarda ekenine toqtaldy.
«Osy oraıda, Memleket basshysynyń «Rýhanı jańǵyrý» baǵdarlamasy jáne «Uly dalanyń jeti qyry» maqalasy óskeleń urpaqtyń rýhanı baılyǵyn, densaýlyǵyn arttyrýǵa erekshe yqpal etetini sózsiz. Bul jumystardyń barlyǵy - sizderdiń ómirlerińizdi jaqsartyp, qoǵamdaǵy rólderińizdi nyǵaıtý úshin, básekege qabiletti kúsheıtý úshin jasalyp jatqan sharalar»,- dedi N.Nyǵmatýlın.
Sonymen qatar, palata spıkeri osy aýqymdy sharalardyń barlyǵyn zań jaǵynan jan-jaqty qoldaý qajettigin aıtty.
«Elbasymyzdyń barlyq bastamalaryn sapaly zańdarmen qamtamasyz etý - bizdiń Parlament depýtattarynyń basty mindeti. Osy jolda ózderińiz bilesizder, «Memlekettik jastar saıasaty týraly» jáne «Volonterlik qyzmet týraly» zańdar qabyldandy. Elimizde Memlekettik jastar saıasatynyń 2020 jylǵa deıingi baǵdarlamasy bar. Jaqynda Májiliste «Pedagog mártebesi týraly» jáne basqa da bilim salasyna qatysty zań jobalary qaralady», - dedi N. Nyǵmatýlın.
Sonymen qatar, palata spıkeri elimizdi damyǵan 30 eldiń qataryna qosý úshin oǵan jastardyń bilimi men biliktiligi qajet ekenin, bul jolda eń aldymen jańa tehnologııalar, ınnovatsııa jáne avtomattandyrýǵa zor nazar aýdarylatynyn aıtty.
