Nurlan Nyǵmatýlın: Zańnamalyq bazany jetildirý ishki týrızmniń damýyna yqpal etedi

NUR-SULTAN. QazAqparat - Búgin palata spıkeri Nurlan Nyǵmatýlınniń tóraǵalyǵymen Májilis Bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat tómengi palatanyń baspasóz qyzmetine silteme jasap.

Depýtattar qaraýyna týrıstik qyzmet máselelerine túzetý engizý týraly zań jobasy birinshi oqylymda usynyldy.

Májilis Tóraǵasy Nurlan Nyǵmatýlın zań jobasynyń aldaǵy ýaqytta jalpy otyrysta qaralatynyn, zańnamalyq bazany jetildirý eldegi týrızmniń damýyna yqpal etetinin atap ótti.

Zań jobasy retteý quraldaryn ońtaılandyrý, týrıstik salany memlekettik qoldaý sharalaryn anyqtaý, sondaı-aq, ońtaıly talaptar esebinen shyǵý týrızmniń qyzmetin retteý jolymen ishki jáne kirý týrızmin damytýdy yntalandyrý boıynsha quqyqtyq jaǵdaılar jasaýǵa baǵyttalǵan.

Sonymen qatar, Májilis depýtattary ratıfıkatsııalyq zań jobalaryn qarastyrady. Olar: kólik quraly jáne ózdiginen júretin mashına jáne tehnıkanyń basqa da túrleri pasporttarynyń biryńǵaı nysandaryn engizý jáne elektrondyq pasporttar júıelerin uıymdastyrý týraly kelisimge Armenııanyń qosylýy, sondaı-aq Qazaqstan men Ózbekstan arasyndaǵy eńbekshi kóship-qonýshylardyń quqyqtaryn qorǵaý týraly.

Bıýro otyrysynda Palatanyń salalyq komıtetteri ana men balany qorǵaý jáne aýdıtorlyq qyzmet máseleleri týraly zań jobalaryn jumysqa alýdy qarastyrdy.