Nurlan Nyǵmatýlın vıtse-mınıstrge eskertý jasady
ASTANA. QazAqparat - Búgin Parlament Májilisiniń jalpy otyrysynda Palata spıkeri Nurlan Nyǵmatýlın qazaqsha qoıylǵan suraqqa oryssha jaýap qaıtarǵan Bilim jáne ǵylym vıtse-mınıstrine eskertý jasady, dep habarlaıdy QazAqparat.
Aıta keteıik, jalpy otyrysta «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasy talqylandy.
Bul turǵyda depýtat Káribaı Musyrman Bilim jáne ǵylym mınıstrligi boıynsha qosymsha bólingen bıýdjet qarajatyn ıgerý máselesine qatysty saýal qoıǵan bolatyn.
Óz kezeginde Bilim jáne ǵylym vıtse-mınıstri Bıbigúl Asylova depýtattyń suraǵyna oryssha jaýap berdi.
Osy oraıda, Májilis tóraǵasy Nurlan Nyǵmatýlın mınıstrlik ókiline eskertý jasady.
«Bıbigúl Amangeldiqyz, siz barlyq muǵalimder men oqýshylardy 3 aıdyń ishinde aǵylshyn tiline úıretip jatyrmyz dep anyqtama berdińiz. Biraq endi memlekettik tildi úırenetin ýaqyt kelgen shyǵar», - dedi Palata spıkeri Bilim jáne ǵylym vıtse-mınıstrine qarata aıtqan sózinde.
