Nurlan Nyǵmatýlın ustazdardy merekesimen quttyqtady
NUR-SULTAN. QazAqparat – Májilis Tóraǵasy Nurlan Nyǵmatýlın ustazdardy kásibı merekesimen quttyqtady, dep habarlaıdy QazAqparat.
«Ustazdardy kásibı merekemen quttyqtaımyn! Osyndaı qıyn kezeńde de sizder urpaqqa bilim berip, el bolashaǵy úshin aıanbaı eńbek etip kelesizder. Sizderge alǵysymyz sheksiz. Barshańyzǵa zor densaýlyq, yrys-qut, bereke tileımin!» - dedi Nurlan Nyǵmatýlın óziniń Twitter -degi paraqshasynda.
Sonymen qatar, Palata Spıkeri Parlamentte «Pedagog mártebesi týraly» arnaıy zańnyń qabyldanǵanyn, ol zań muǵalimderdiń mártebesin kóterip, áleýmettik jaǵdaıyn arttyrýǵa yqpal etkenin atap ótti.
Aıta ketsek, qazan aıynyń alǵashqy jeksenbisinde Qazaqstanda muǵalimderdiń kásibı merekesi atap ótiledi.
Bul ataýly kún 1965 jyly 29 qyrkúıekte KSRO Joǵarǵy Keńesi Prezıdıýmynyń Buıryǵymen belgilengen. Búgingi tańda Qazaqstan, Belarýs, Latvııa jáne Ýkraına Muǵalimder kúnin qazannyń alǵashqy jeksenbisinde atap ótedi. Al kórshiles Ózbekstan – 1 qazanda, Qyrǵyzstan, Ázerbaıjan, Reseı, Tájikstan, Armenııa, Moldavııa, Estonııa jáne Lıtva – ustazdar merekesin 5 qazan kúnine bekitken.
