Nurlan Nyǵmatýlın Ulybrıtanııa elshisin qabyldady
NUR-SULTAN. QazAqparat - Búgin Májiliste Palata tóraǵasy Nurlan Nyǵmatýlın Ulybrıtanııa jáne Soltústik Irlandııa Qurama Koroldiginiń Qazaqstan Respýblıkasyndaǵy Tótenshe jáne Ókiletti Elshisi Maıkl Gıffordpen kezdesti, dep habarlaıdy QazAqparat Májilistiń baspasóz qyzmetine silteme jasap.
Taraptar eki el arasyndaǵy yntymaqtastyqty damytýdyń ózekti máseleleri boıynsha pikir almasty.
Sonymen qatar, kelesi jyly Qazaqstan men Brıtanııa arasyndaǵy dıplomatııalyq qatynastardyń ornaǵanyna 30 jyl tolatynyn atap ótken Palata spıkeri osy jyldar ishinde elder arasynda senimdi saıası dıalog ornaǵanyn, saýda-ekonomıkalyq jáne mádenı-gýmanıtarlyq yqpaldastyqtyń belsendi damyǵanyn jetkizdi.
Kezdesý barysynda Májilis tóraǵasy Qazaqstannyń Tuńǵysh Prezıdenti Nursultan Nazarbaev jáne Memleket basshysy Qasym-Jomart Toqaevtyń Qazaqstan-Brıtan yntymaqtastyǵyn nyǵaıtýǵa qosqan úlesi elder arasyndaǵy strategııalyq áriptestiktiń jańa kezeńine shyǵýǵa múmkindik bergenine nazar aýdardy.
Nurlan Nyǵmatýlınniń aıtýynsha, qazirgi ýaqytta qos memleket arasyndaǵy jańa strategııalyq áriptestik jáne yntymaqtastyq týraly kelisimdi qabyldaý úshin belsendi jumys júrgizilýde.
Óz kezeginde, Maıkl Gıfford eki jaqty qarym-qatynastyń deńgeıin joǵary baǵalap, ekonomıkalyq seriktestik pen parlamentaralyq baılanysty damytýdyń mańyzdylyǵyna toqtaldy. Sondaı-aq, Elshi Qazaqstannyń Prezıdenti Qasym-Jomart Toqaev júrgizip otyrǵan reformalardy qoldaıtynyn jetkizdi.
Nurlan Nyǵmatýlın men Maıkl Gıfford qazaqstandyq jáne brıtandyq Parlament ókilderi arasyndaǵy dıalogty jandandyrý eki el úshin de tıimdi bolatynyna senim bildirdi.
