Nurlan Nyǵmatýlın Túrkııanyń Ulttyq Jınalysynyń tóraǵasymen kezdesti

ASTANA. QazAqparat - Májilis Tóraǵasy Nurlan Nyǵmatýlın men Túrkııa Uly Ulttyq Jınalysynyń Tóraǵasy Bınalı Iyldyrym Antalııadaǵy Eýrazııa elderi parlamentteri spıkerleriniń úshinshi jınalysy aıasynda parlamentaralyq yntymaqtastyqty odan ári yntalandyrý jaıyn talqylady, dep habarlaıdy tómengi palatanyń baspasóz qyzmeti.

Kezdesýde eki el kóshbasshylary Nursultan Nazarbaev pen Rejep Taıyp Erdoǵannyń ózara túsinistikke negizdelgen birlesken tıimdi jumysynyń arqasynda Qazaqstan men Túrkııa kópqyrly áriptestikti nyǵaıtýda joǵary nátıjelerge qol jetkizgenin atap ótti.

Búgingi tańda eki el arasyndaǵy qarqyndy saıası dıalog pen tereń ekonomıkalyq baılanystar ornatylyp, ózara is-qımyl yntymaqtastyqtyń barlyq salalarynda tıimdi damyp keledi.

Májilis Tóraǵasynyń pikirinshe, Qazaqstan men Túrkııa elderiniń qarym-qatynasyna 2017 jyldyń qyrkúıek aıyndaǵy Túrkııa Prezıdentiniń Qazaqstanǵa resmı sapary jáne Qazaqstan Prezıdentiniń osy jyldyń qyrkúıek aıyndaǵy Túrkııaǵa resmı sapary elder arasyndaǵy baılanystyń nyǵaıýyna tyń serpin berdi.

Kezdesýde Memleket Basshysy Nursultan Nazarbaevtyń 5 qazandaǵy Qazaqstan halqyna Joldaýynda aıtylǵan negizgi baǵyttardy atap ótken Májilis Tóraǵasy, kólik jáne logıstıka, týrızm jáne aýyl sharýashylyǵy salalary ekijaqty yqpaldastyqtyń basym baǵyttary bola alatynyna toqtaldy.

Nurlan Nyǵmatýlın men Bınalı Iyldyrym parlamentaralyq baılanystyń nyǵaıýy Astana men Ankaranyń ózara jan-jaqty tıimdi yntymaqtastyǵyn damytýǵa yqpal etetinine senim bildirdi.