Nurlan Nyǵmatýlın Túrkııada Elbasy maqalasy týraly aıtty

ASTANA. QazAqparat - Májilis tóraǵasy Nurlan Nyǵmatýlın Izmırde ótip jatqan Túrki elderi Parlamenttik Assambleıasynyń otyrysynda Memleket Basshysy Nursultan Nazarbaevtyń «Uly dalanyń jeti qyry» atty aýqymdy maqalasy týraly aıtty. Bul týraly QazAqparat Májilistiń baspasóz qyzmetine silteme jasap habarlaıdy.

Májilis tóraǵasy Elbasy maqalasynyń basty ıdeıasy men negizgi usynystary bizdiń elimizdiń ǵana emes, búkil túrki álemi úshin tarıhı sharalardyń basty oqıǵasy bolyp tabylatynyna nazar aýdardy. Memleket Basshysy óz maqalasynda qazirgi Qazaqstan men túrkitildes elder jáne ótken uly dala ımperııalarynyń arasyndaǵy ajyramas ishki baılanystardy kórsetkenine toqtalǵan Májilis tóraǵasy, Táýelsiz Qazaqstannyń Tuńǵysh Prezıdenti jahandyq saıasatker, bolashaqty dál jáne naqty túrde boljaıtyn bizdiń zamanymyzdyń shynaıy fılosofy ekenin taǵy da dáleldegine mán berdi.

«Qazaqstan Respýblıkasynyń Prezıdenti Nursultan Ábishuly Nazarbaevtyń teńdessiz ereksheligi óz halqynyń tarıhymen birlikte bolýynyń jáne onyń bolashaǵyn qalyptastyrý bolyp tabylady», - dedi Nurlan Nyǵmatýlın.

Májilis Tóraǵasy osyndaı aýqymdy jobalardyń búkil túrki álemi úshin mańyzy men ózektiligine mán berip, Elbasynyń «Arhıv - 2025», «Uly dalanyń uly esimderi», «Túrki áleminiń genezısi», «Uly dalanyń ejelgi óner jáne tehnologııalar mýzeıi», «Dala folklory men mýzykasynyń myń jyly», «Tarıhtyń kıno óneri men televızııadaǵy kórinisi» sııaqty aýqymdy bastamalaryna toqtaldy.