Nurlan Nyǵmatýlın: Sport nusqaýshylaryna jan-jaqty qoldaý qajet
NUR-SULTAN. QazAqparat - Búgin Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta depýtattar dene shynyqtyrý jáne sport máselelerine qatysty zań jobasyn maquldady, dep habarlaıdy tómengi palatanyń baspasóz qyzmeti.
Nurlan Nyǵmatýlın zań jobasynyń mańyzdylyǵyn alǵa tarta kele: «Osy buqaralyq sportty damytý - bizdiń bolashaǵymyz úshin, onyń ishinde, jastarymyz úshin óte mańyzdy. Sebebi, búgingi osy elimizdiń abyroıyn kóterip júrgen olımpıada jáne álem chempıondary buqaralyq sporttan shyqty. Ásirese, boks pen kúres chempıondary aýyldan shyqqanyn bilemiz. Sondyqtan, sport nusqaýshylarynyń jalaqysyn kóterý, olardyń jumystaryn uıymdastyrý Sport mınıstrliginiń basty mindetteriniń biri bolý kerek», - dedi.
Engizilgen jańa normalar buqaralyq sportty damytyp, dene shynyqtyrý jáne sport salasynda kórsetiletin qyzmetterdiń sapasyn arttyrýǵa múmkindik beredi.
Zań jobasynda júrip-turýy shekteýli adamdardyń dene shynyqtyrýmen aınalysýyna múmkindik beretin normalar da qarastyrylǵan.
Sondaı-aq, dárigerlik-dene shynyqtyrý dıspanserlerin qurý, bilim berý baǵdarlamalaryna ulttyq sport túrleri boıynsha mindetti shartty engizý usynylady. Bul normalar dene shynyqtyrý jáne sport salasynda kórsetiletin qyzmetterdiń sapasyn arttyrýǵa múmkindik beredi.
