Nurlan Nyǵmatýlın SQO kásipkerlerimen kezdesti

ASTANA. QazAqparat - Májilis Tóraǵasy Nurlan Nyǵmatýlınniń Soltústik Qazaqstan oblysy aýylsharýashylyǵy ónimin óndirýshilermen kezdesýinde Elbasynyń bes áleýmettik bastamalary áńgime ózegine aınaldy. Bul týraly QazAqparat Májilistiń baspasóz qyzmetine silteme jasap habarlaıdy.

Kezdesý kezinde ásirese, shaǵyn nesıeleý, shaǵyn jáne orta bıznesti damytý, sondaı-aq, halyqty eńbekpen qamtý máselelerine aıryqsha nazar aýdaryldy.

«Elbasynyń tapsyrmasy boıynsha osy jyly qosymsha 20 mıllıard teńge bólinip, shaǵyn nesıelerdiń jalpy somasy 62 mıllıard teńgege jetetin bolady. Bul óz isin ashqysy keletin azamattarǵa zor múmkindik beredi.  Sondaı-aq, aýyldaǵy kásipkerlikti damytý úshin óte qajetti. Atalǵan áleýmettik joba aýyldyq turǵyndary kóp sizderdiń oblys úshin óte mańyzdy», - dedi N. Nyǵmatýlın.

Óz kezeginde bul bastama aýyl halqynyń da erekshe qyzyǵýshylyǵyn týǵyzdy.  

Kezdesý barysynda aýylsharýashlyǵyna tsıfrlyq tehnologııany engizý jaıy da nazardan tys qalmady. Ol ónimdilikti nyǵaıtýmen qatar, sapasyn kúsheıtýge de keń jol ashatyny sózsiz.

Nurlan Nyǵmatýlın Elbasynyń áleýmettik bastamalaryn júzege asyrý árbir óńirge tyń serpin beretinin jáne halyqtyń ál-aýqatyn kóterýge zor yqpal etetinin atap ótti.