Nurlan Nyǵmatýlın RF Memlekettik Dýmasynyń tóraǵasymen kelissózder júrgizdi
ASTANA. QazAqparat - Túrkııa astanasy Antalııa qalasynda «Ekonomıkalyq yntymaqtastyq, qorshaǵan orta jáne Eýrazııadaǵy ornyqty damý» taqyrybyna arnalǵan forým bastaldy. Forým aıasynda Májilis Tóraǵasy Nurlan Nyǵmatýlın RF Memlekettik Dýmasynyń spıkeri Vıacheslav Volodınmen kezdesti, dep habarlaıdy QR Parlamenti Májilisiniń baspasóz qyzmeti.
Kezdesý barysynda taraptar osy suhbat alańynyń mańyzdylyǵyn jáne ár jıyn saıyn qatysýshy elder men adamdar sanynyń artyp kele jatqanyn atap ótti. Bıyl forýmǵa álemniń 40 eli men 5 halyqaralyq uıym qatysýda.
Nurlan Nyǵmatýlın Qazaqstan men Reseı arasyndaǵy qarym-qatynas týraly, Qazaqstan Prezıdenti Nursultan Nazarbaev pen Reseı Prezıdenti Vladımır Pýtınniń dostyq jáne belsendi ózara is-qımylyna negizdelgen eki el arasyndaǵy qarym-qatynastyń strategııalyq sıpatyna toqtaldy.
Májilis Tóraǵasynyń pikirinshe, bul eki el prezıdentteriniń kelisimderin zańnamalyq turǵydan qoldaıtyn qos memlekettiń parlamentiniń jumysyna serpin beredi.
Nurlan Nyǵmatýlın men RF Memlekettik Dýmasynyń spıkeri Vıacheslav Volodın Eýrazııa elderiniń parlamentteri spıkerleriniń úshinshi jınalysyna usynylǵan taqyryptyń ózektiligine nazar aýdardy. Sonymen qatar, Qazaqstan men Reseı biryńǵaı ekonomıkalyq keńistikte ornalasqanyn alǵa tarta otyryp, ekologııa men qorshaǵan ortany qorǵaý máseleleriniń mańyzdylyǵyn da atap ótti.
