Nurlan Nyǵmatýlın Polsha elshisin qabyldady
ASTANA. QazAqparat - Búgin Májilis Tóraǵasy Nurlan Nyǵmatýlın Polsha Respýblıkasynyń Tótenshe jáne Ókiletti Elshisi Selım Hazbıevıchti qabyldady, dep habarlaıdy Májilistiń baspasóz qyzmeti.
Kezdesý barysynda N.Nyǵmatýlın Qazaqstan-Polsha qarym-qatynastarynyń nyǵaıyp, onyń damýyna qýatty serpin bergen Qazaqstan Prezıdenti Nursultan Nazarbaev pen Polsha Prezıdenti Andjeı Dýdanyń ózara saparlary ekenin atap ótti.
Májilis Tóraǵasynyń pikirinshe, Qazaqstan men Eýropalyq odaq arasyndaǵy keńeıtilgen áriptestik jáne yntymaqtastyq týraly Kelisimniń sheńberinde jáne bizdiń eldiń Eýrazııalyq ekonomıkalyq odaqqa qatysýy ekijaqty yntymaqtastyqtyń zor múmkindikterin ashýda.
Sondaı-aq, júzdesý barysynda N.Nyǵmatýlın Ortalyq Azııa men Qytaı naryǵyna qol jetkizýdi qamtamasyz etý úshin Astana aımaqtaǵy Varshavanyń negizgi seriktesi bolyp tabylatynyn aıtty.
Óz kezeginde Selım Hazbıevıch Qazaqstan men Polsha arasyndaǵy saıası, dıplomatııalyq jáne ekonomıkalyq qatynastardyń deńgeıine joǵary baǵa berdi.
Taraptar basty baǵyttardyń arasynda kólik salasy, kómirdi óńdeý men aýany lastamaıtyn «taza tehnologııalar» jáne bilim berý salasyna toqtaldy.
Munymen qatar N.Nyǵmatýlın men S. Hazbıevıch halyqaralyq kún tártibindegi ózekti máselelerdi talqylady. Májilis Tóraǵasy dıplomatty 2018-2019 jyldarǵa arnalǵan BUU QK turaqty emes múshesi retinde Polsha jumysynyń bastalýymen quttyqtap, Qazaqstan men Polshanyń prezıdentteri atap ótken Qaýipsizdik Keńesiniń birlesken jumysynyń aıasynda yntymaqtastyq týraly ustanymdardyń uqsastyǵyna toqtaldy. Ásirese, beıbitshilik pen qaýipsizdikti nyǵaıtý, halyqaralyq lańkestik pen zorlyq-zombylyqqa qarsy kúres máselelerine basa nazar aýdardy. Osyǵan baılanysty, BUU alańynda ortaq múddelerdi ilgeriletýdegi yntymaqtastyqty nyǵaıtý nıetin rastady.
Taraptar sonymen qatar ortaq múddeni ilgeriletýge parlamentaralyq belsendi dıalogty nyǵaıtýdyń yqpal etetinine senim bildirdi.
