Nurlan Nyǵmatýlın Parlamenttiń jańa tórtinshi sessııada atqaratyn jumystarymen bólisti
ASTANA. QazAqparat - Búgin Parlament palatalarynyń birlesken otyrysynda Májilis tóraǵasy Nurlan Nyǵmatýlın aldaǵy tórtinshi sessııa barysynda júzege asyrylatyn jumystardy jarııa etti, dep habarlaıdy QazAqparat.
«Aldymyzda áli de talqylanatyn máseleler, qabyldanatyn zańdar, birlesip atqaratyn sharalar óte kóp. Osyǵan oraı kelesi tórtinshi sessııada Parlament Elbasynyń Joldaýy men bes áleýmettik bastamany iske asyrýǵa arnalǵan jumystardy odan ary jalǵastyratyn bolady. Depýtattyq korpýs Úkimetpen tyńyz baılanys jasaı otyryp, otandyq ekonomıkany kúsheıtýge, kásipkerlerdi qoldaýǵa, áleýmettik kepildikterdi saqtaýǵa, elimizdi odan ary qaraı nyǵaıtýǵa jáne demokratııany damytýǵa baǵyttalǵan zań qabyldaıtyn bolady», - dedi N. Nyǵmatýlın.
Qazirgi ýaqytta Parlament qaraýynda 45 zań jobasy bar. Olardyń qatarynda arnaıy ekonomıkalyq jáne ındýstrıaldyq aımaqtar týraly, memlekettik statıstıka, memlekettik satyp alý máseleleri jónindegi, sondaı-aq agroónerkásiptik keshenin retteý, kınematografııa týraly zań jobalary óte mańyzdy bolyp otyr.
«Aldaǵy tórtinshi sessııada jumyspen qamtý salasynyń problemalary men damý perspektıvalary, quqyq qorǵaý qyzmetiniń protsestik negizderin jańǵyrtý barysy sııaqty mańyzdy máseleler boıynsha parlamenttik tyńdaýlar ótkizý josparlanǵan. Jańa sessııa bastalǵannan keıin qazan aıynda Astanada «Investıtsııa jastarǵa» degen halyqaralyq konferentsııa uıymdastyrýǵa bastamashy bolamyz», - dedi Májilis tóraǵasy.
Aıta keteıik, búgin Parlament palatalarynyń birlesken otyrysy ótip, altynshy saılanǵan Parlament úshinshi sessııasyn aıaqtady.
