Nurlan Nyǵmatýlın Ózbekstan prezıdentimen kezdesti
TAShKENT. QazAqparat - Májilis Tóraǵasy Nurlan Nyǵmatýlın Ózbekstanǵa resmı sapar barysynda osy eldiń prezıdenti Shavkat Mırzıeevpen kezdesti, dep habarlaıdy QazAqparat tómengi palatanyń baspasóz qyzmetine silteme jasap.
Palata spıkeri Ózbekstan prezıdentine Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń atynan izgi sálemin jetkize otyryp, Nursultan Ábishulynyń ózbek halqyna jáne eki el arasyndaǵy yntymaqtastyqty damytýǵa degen erekshe yqylasyn atap ótti.
Kezdesý barysynda qos memleket arasyndaǵy ózara yqpaldastyqty odan ári tereńdetýdiń ózekti máseleleri jan-jaqty talqylandy.
Sonymen qatar Májilis tóraǵasy Qazaqstan men Ózbekstan kóshbasshylary arasyndaǵy barlyq strategııalyq kelisimderge zańnamalyq qoldaý kórsetýge daıyn ekendigine toqtaldy.
- Osy baýyrlas elde ótken barlyq kezdesýler Ózbekstan halqynyń Qazaqstannyń Tuńǵysh Prezıdenti - Elbasy Nursultan Nazarbaevqa degen erekshe nıetin, erekshe qurmetin kórsetti. Sebebi Nursultan Ábishulynyń jáne Ózbekstan prezıdenti Shavkat Mırzıeevtiń salıqaly saıasatynyń arqasynda bizdiń elderimiz qaı salada bolsa da - ekonomıka bolsyn, mádenı bolsyn, barlyq jaǵynan joǵary dárejege jetti. Parlamenttik baılanys ta sonyń nátıjesinde jańa deńgeıge kóterildi. Osy yntymaqtastyqty odan ári nyǵaıtý maqsatynda biz ózbekstandyq áriptestermen naqty kelisimder jasadyq. Endi aldaǵy ýaqytta birqatar birlesken sharalardy qolǵa alatyn bolamyz, - dedi Ózbekstandaǵy resmı saparyn qorytyndylaǵan Májilis tóraǵasy N. Nyǵmatýlın.
