Nurlan Nyǵmatýlın men Tımýr Qulybaev 2020 jylǵa arnalǵan Jol kartasyna qol qoıdy

NUR-SULTAN. QazAqparat – QR Parlamenti Májilisiniń tóraǵasy Nurlan Nyǵmatýlın men «Atameken» UKP Tóralqasynyń tóraǵasy Tımýr Qulybaev 2020 jylǵa arnalǵan QR Parlamentiniń Májilisindegi «Nur Otan» partııasynyń fraktsııasy men «Atameken» Ulttyq kásipkerler palatasy yntymaqtastyǵynyń Jol kartasy memorandýmyna qol qoıdy, dep habarlaıdy QazAqparat.

Depýtattyq korpýs otandyq bıznes-qaýymdastyqtyń múddesine qatysty zań jobalaryn qaraý barysynda «Atameken» Ulttyq palatasymen tyǵyz jumys isteıdi.

Elimizde kásipkerlikti damytýdyń mańyzdylyǵyna toqtalǵan Palata spıkeri Nurlan Nyǵmatýlın Qazaqstannyń Tuńǵysh Prezıdenti – Elbasy Nursultan Nazarbaev pen Memleket basshysy Qasym-Jomart Toqaevtyń aıryqsha qoldaýymen elimizde bıznes salasynyń qarqyndy damyp kele jaqanyn atap ótti.

Májilis tóraǵasy 2017 jyly «Nur Otan» partııasy men «Atameken» UKP arasyndaǵy 2017-2018 jyldarǵa arnalǵan Qazaqstan Úkimetiniń zań jobalaý jumys josparlary aıasynda yntymaqtastyq týraly Memorandým jóninde Jol kartasyna qol qoıylǵanyn, ondaǵy qoıylǵan maqsattardyń oryndalǵanyn jetkizdi.

«Endi jańa qujatqa sáıkes, Májilis depýtattary men kásipkerler qaýymdastyǵy aldaǵy jyly 9 mańyzdy baǵyt boıynsha jumysty jalǵastyrady. Atap aıtqanda, bıznesti qorǵaý jáne sybaılas jemqorlyqqa qarsy is-qımyl, salyq jáne bıýdjet zańnamasyn jetildirý, memlekettik satyp alýlar, otandyq taýar óndirýshilerdi qoldaý, sáýlet, qala qurlysy jáne qurylys qyzmeti men jer qatynastary salasyndaǵy máselelerdi sheshý, óńirlik damý – aýylda bıznesti damytý, bıznestiń tutynýshylar aldyndaǵy jaýapkershiligin kúsheıtý jáne memlekettik-jekemenshik áriptestik, adam kapıtalyn damytý. Bizdiń aldymyzda eldegi bıznes ahýaldy damytý boıynsha óte mańyzdy mindetter tur, olardy mejeli ýaqytta júzege asyrýymyz kerek»,- dedi N. Nyǵmatýlın.