Nurlan Nyǵmatýlın men Koreıa Parlamentiniń spıkeri ózara yntymaqtastyqty talqylady

NUR-SULTAN. QazAqparat - Májilis Tóraǵasy Nurlan Nyǵmatýlın Koreıa Respýblıkasy Ulttyq Assambleıasynyń Tóraǵasy Pak Ben Sokpen kezdesti, dep habarlaıdy QazAqparat.

Pandemııa jaǵdaıyna baılanysty onlaın formatta ótken kezdesý barysynda taraptar barlyq sala boıynsha ekijaqty qarym-qatynasty, sonyń ishinde, parlamentaralyq yntymaqtastyqty damytý jaıynda pikir almasty.

Sondaı-aq, Qazaqstanda júrgizilip jatqan saıası reforma týraly keńinen áńgime qozǵaldy.

Májilis Tóraǵasy Koreıa Qazaqstannyń Shyǵys Azııadaǵy mańyzdy strategııalyq áriptesteriniń biri ekenin alǵa tarta kelip, saıası, saýda-ekonomıkalyq saladaǵy jetistikterge toqtaldy.

Nurlan Nyǵmatýlın atap ótkendeı, dıplomatııalyq qatynas ornaǵan 29 jyldyń ishinde Nur-Sultan men Seýl arasynda qarqyndy saıası dıalog ornap, eki el qatynasyn tereńdetýdiń berik irgetasy qalandy.

Palata spıkeriniń aıtýynsha, bul jolda Qazaqstannyń Tuńǵysh Prezıdenti Nursultan Nazarbaevtyń róli zor.

Búginde qalyptasqan strategııalyq áriptestik Qazaqstan Prezıdenti Qasym-Jomart Toqaevtyń jalǵastyrýymen odan ári nyǵaıyp keledi.

Óz kezeginde Pak Ben Sok myrza Qazaqstandy óziniń damý jolyn usynǵan úlgili memleket retinde álemge tanylǵanyn alǵa tarta kelip, eki el arasyndaǵy joǵary deńgeıdegi yqpaldastyq qarym-qatynasty rastaı otyryp, aldaǵy ýaqytta dástúrli kezdesýler men is sharalardy belsendi jalǵastyrý kerektigin atap ótti.

Kezdesý ıeleriniń pikirinshe, osyndaı kezdesýler Qazaqstan men Ońtústik Koreıa arasyndaǵy ózara senimdi, áriptestikti damytýǵa yqpal etedi.