Nurlan Nyǵmatýlın memlekettik satyp alýlardaǵy zańsyzdyqtardy atady
ASTANA. QazAqparat - Parlament Májilisiniń tóraǵasy Nurlan Nyǵmatýlın memlekettik satyp alýlar salasyndaǵy quqyq buzýshylyqtarǵa qatysty pikir bildirdi, dep habarlaıdy QazAqparat.
Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik satyp alý jáne kvazımemlekettik sektor sýbektileriniń satyp alý máseleleri boıynsha ózgerister men tolyqtyrýlar engizý týraly» zań jobasy talqylanyp, birinshi oqylymda maquldandy.
«Bul zań jobasy memlekettik satyp alýlar júıesin jaqsartýǵa, sonymen qatar sybaılas jemqorlyqqa jol bermeýge baǵyttalǵan. Sondyqtan Úkimet músheleri de, depýtattyq korpýs ta engizgen ózgerister qylmystardyń aldyn alýǵa jáne qyzmetterdi talapqa saı jetildirýge zor yqpal etedi dep senemiz. Májilistiń jalpy otyrysynda aıtylǵan usynystardy nazarǵa alyp, zań jobasyn ekinshi oqylymǵa jan-jaqty daıyndaýymyz qajet», - dep toqtaldy N. Nyǵmatýlın.
Sonymen qatar Májilis tóraǵasy búginde osy salada oryn alyp otyrǵan kemshilikterge toqtalyp ótti.
«Ókinishke qaraı, memlekettik satyp alýlar salasynda sybaılas jemqorlyq quqyq buzýshylyqtar jyl saıyn ósip keledi. Tek bıylǵy segiz aıda saladaǵy qylmystyq quqyq buzýshylyqtar 2017 jylǵy kórsetkishterden eki esege asyp tústi. Eger 2017 jyly 42 jaǵdaı tirkelse, al bıylǵy 8 aıda 74-ke jetti. Tártiptik jaýapqa tartylǵandar tórt esege artty, olar negizinen memlekettik qyzmetshiler. 2017 jyly 61 adam bolsa, 2018 jylǵy segiz aıda 267 adam jazasyn aldy», - dedi Nurlan Nyǵmatýlın.
Budan buryn habarlanǵandaı, zań jobasyn talqylaý barysynda QR Qarjy mınıstri Álıhan Smaıylov memlekettik satyp alýlar salasyndaǵy problemalardy ataǵan bolatyn.
Sonymen qatar mınıstr qurylys salasynda memlekettik satyp alýdy jetildirý tártibin túsindirdi.
Zań jobasy aıasynda sottalǵandardy memtapsyrysty oryndaýǵa jumyldyrý sharalary eskerilgen.
